Ulttyq bank «Dońyz jyly» monetalaryn aınalymǵa shyǵardy
ASTANA. QazAqparat - Qazaqstan Respýblıkasynyń Ulttyq banki búgin nomınaly 500 teńgelik «Shyǵys kúntizbesi» monetalar serııasynan «Dońyz jyly» altyn jáne kúmis eskertkish monetalaryn aınalysqa shyǵardy. Bul týraly QazAqparat Banktiń baspasóz qyzmetine silteme jasap habarlaıdy.
«Dońyz jyly» monetalary osy serııany jalǵastyratyn, altyn jáne kúmis monetalardyń toǵyzynshy juby bolyp tabylady. 2019 jylǵy 5 aqpannan bastap shyǵys kúntizbesi boıynsha dońyz jyly bastalady.
On eki qyrly monetanyń ıdeıasy jyl sımvolyn monetanyń ishki jıeginen ortasyna qaraı jyljytý arqyly jyl sımvolynyń beınesin jyl saıynǵy aýystyrýǵa negizdelgen. Kúntizbe keıipkerleri Eýrazııa halyqtary kosmogonııalyq kórinisteriniń plastıkasynda oryndalǵan.
Monetalardyń dızaınynda Almaty qalasynyń «Shyǵys kúntizbesi» sýburqaǵynyń músindik kompozıtsııasynyń beıneleri paıdalanyldy. Músindik kompozıtsııa avtorlary: Qazaqstannyń eńbek sińirgen óner qaıratkeri, sýretshi-monýmentalıst V. Tverdohlebov A. Tatarınovpen jáne V. Katsevpen birlesken avtorlyqta.
«Dońyz jyly» monetalarynyń sıpattamasy:
Monetalardyń bet jaǵynda (aversinde) aspan álemindegi juldyzdar kartasynda juldyzdar shoǵyrynyń mıfologııalyq sımvoldary jáne moneta daıyndalǵan metaldy, onyń synamy men massasyn bildiretin jazý beınelengen. Monetany aınaldyra «QAZAQSTAN RESPÝBLIKASY» jáne «REPUBLIC OF KAZAKHSTAN» degen jazýlar, kúnniń stıldendirilgen beınesi jáne monetanyń nomınaly beınelengen.
Monetalardyń syrt jaǵynda (reversinde) ortalyq bóliginde shyǵys kúntizbesi boıynsha 2019 jyldyń sımvoly - dońyz beınelengen. Monetany aınaldyra «2019», «ShYǴYS KÚNTІZBESІ», «VOSTOChNYI KALENDARЬ» jáne «ORIENTAL CALENDAR» degen jazýlar jazylǵan. Monetanyń ishki jaǵynda shyǵys kúntizbesiniń qalǵan on bir sımvoly ornalasqan.
Altyn jáne kúmis monetalar on eki qyrly. Monetalardyń bet jáne syrt jaǵyndaǵy beıneler men jazýlar birdeı. Qyry (gýrty) tegis, bedersiz jáne jazýsyz.
Monetalar:
1) 999 synamdy altynnan jasalǵan, massasy - 7,78 gr., sıpattalǵan sheńberiniń dıametri - 21,87 mm, daıyndaý sapasy - «proof», taralymy - 200 dana;
2) 925 synamdy kúmisten jasalǵan, massasy - 31,1 gr., sıpattalǵan sheńberiniń dıametri - 38,61 mm, daıyndaý sapasy - «proof», taralymy - 1 myń dana.
Nomınaly 500 teńgelik kollektsııalyq monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
Kollektsııalyq monetalardy «Qazaqstan Respýblıkasy Ulttyq Bankiniń Qazaqstan teńge saraıy» sharýashylyq júrgizý quqyǵyndaǵy respýblıkalyq memlekettik kásiporny daıyndaǵan.
Altyn jáne kúmis monetalar kádesyılyq oraýmen shyǵarylady jáne Qazaqstan Respýblıkasy Ulttyq Bankiniń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan.
