Ulttyq bank dezınflıatsııalyq aqsha-kredıt saıasatyn júrgizýdi jalǵastyrady – Pirmatov

NUR-SULTAN. QazAqparat – Ulttyq bank dezınflıatsııalyq aqsha-kredıt saıasatyn júrgizýdi jalǵastyrady. Bul týraly Úkimettiń keńeıtilgen otyrysynda QR Ulttyq bankiniń tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Úkimetpen birlesken sharalardy iske asyrý nátıjesinde 2021 jyldyń qorytyndysy boıynsha ınflıatsııa qyrkúıek-qazan aılaryndaǵy eń joǵary 8,9 paıyzdan 8,4 paıyzǵa deıin baıaýlady. Alaıda, bazalyq ınflıatsııanyń traektorııasy ınflıatsııa baıaýlaýynyń áli de turaqsyz ekenin kórsetedi. Bıylǵy qańtarda ınflıatsııanyń taǵy 8,5 paıyzǵa deıin jedeldeýi osyny dáleldeıdi», - dedi UB tóraǵasy.

Onyń atap ótýinshe, ınflıatsııa protsesteriniń ornyqsyzdyǵyn baıqaı otyryp, Ulttyq bank osy jylǵy 24 qańtarda bazalyq stavkany 10,25 paıyzǵa deıin 50 bazalyq tarmaqqa kóterdi.

Bul ınflıatsııany bıylǵy jyldyń sońyna qaraı boljanatyn 6-6,5 paıyz dálizine qaıtarýǵa yqpal etetin bolady.

«Ulttyq bank kelesi boljamdyq raýndynyń aıasynda naýryz aıynda 2022 jylǵa arnalǵan ınflıatsııa boljamyn ózektendiredi. Baǵanyń ósýin odan ári tómendetý úshin Ulttyq bank dezınflıatsııalyq aqsha-kredıt saıasatyn júrgizýdi jalǵastyrady. Ol Úkimet tarapynan taýar naryqtaryndaǵy dısbalanstarǵa jol bermeýge baǵyttalǵan júıeli sharalarmen qatar oryndalýy tıis», - dedi Ǵalymjan Pirmatov.