Ulttyq bank devalvatsııa týraly: Valıýtanyń qubylyp turǵanyna úırený kerek
ASTANA. QazAqparat - QR Ulttyq banki tóraǵasynyń orynbasary Oleg Smolıakov devalvatsııaǵa qatysty alypqashpa áńgimeni joqqa shyǵardy, dep xabarlaıdy QazAqparat tilshisi.
«Devalvatsııa týraly alypqashpa áńgimeler shyndyqqa janaspaıdy. Bizde jyl saıyn maýsym-shilde aıynda osyndaı áńgimeler kóp taraıdy. Qyrkúıekke qaraı devalvatsııa bolady dep, xalyqty qorqytady. Biz ylǵı aıtamyz, naqty málimetterge kóńil bólý kerek. Qazaqstanda ımport pen eksport operatsııalarynyń tepe-teńdigi bar. Rezervter azaıyp jatqan joq. Munaıdyń baǵasy 70 dollardan joǵary. Iá, reseılik rýbldiń qubylýy júıkeni sál juqartyp otyrady. Atalǵan valıýta birde joǵary, birde tómen túsýde. Biraq bul teńgege áser etetin jalǵyz faktor emes. Sondyqtan ósekke senýdiń qajeti joq», - dedi O.Smolıakov jýrnalısterge bergen suxbatynda.
Onyń aıtýynsha, damyǵan memleketterde ulttyq valıýta bir kúnniń ishinde 1-2 protsentke qubylýy ábden múmkin. Bul - zańdy qubylys.
«1-2 protsent, ol shamamen, 6 teńge. Bizde bir kúnde ondaı ózgerister bolǵan joq. Sondyqtan ondaı ózgeristerge alańdaýdyń qajeti joq. Jalpy, valıýtanyń sál-pál qubylyp turǵanyna úırený kerek. Onda turǵan eshteńe joq. Negizi, aqshany 50/50 qaǵıdatymen saqtaǵan durys dep oılaımyn. Sonda utylmaısyz. Árıne, qosymsha paıda da bolmaıdy. Aqsha sol kúıinde saqtalady. Bir jaǵy arzandasa, ekinshi jaǵy qymbattaıdy degen sııaqty», - dep atap kórsetti O.Smolıakov.
