Ulttyq bank boryshkerlerdi ıpotekalyq úılerinen shyǵarýdy toqtata turýdy usynady

ALMATY. QazAqparat - Búgin Almatyda QR Ulttyq Banki, Almaty qalasynyń ákimdigi, ekinshi deńgeıdegi bankter men qoǵamdyq birlestikter arasynda problemalyq ıpotekalyq qaryz alýshylardyń óz mindettemelerin oryndaýyna baılanysty máselelerdi sheshý sheńberinde ózara túsinistik jáne yntymaqtastyq týraly memorandýmǵa qol qoıyldy. Bul týraly QR Ulttyq Bankiniń baspasóz qyzmetinen habarlady.

«Memorandýmnyń erejelerine sáıkes, taraptar qaryz alýshylardyń bankter aldyndaǵy mindettemelerin oryndaýy kezinde máselelerdi sheshý úshin kúsh-jigerlerin jumyldyrý qajettiligin sezine otyryp, olardyń Memorandýmda aıqyndalǵan talaptardy oryndaýy kezinde qaryz alýshyny/kepil berýshini jalǵyz baspanasynan shyǵarýǵa jol bermeý boıynsha sharalar qabyldaıtyn bolady», - delingen habarlamada.    

Taraptar arasyndaǵy yntymaqtastyq Qazaqstan Respýblıkasynyń qoldanystaǵy zańnamasynyń normalaryn, ózara qarym-qatynastardyń etıkalyq normalaryn saqtaý, Memorandým talaptaryn adal oryndaý qaǵıdattaryna negizdeledi jáne júzege asyrylady.  

Memorandým sheginde qaryz alýshy tarapynan bank aldyndaǵy mindettemelerin oryndaýdyń ózara tıimdi talaptaryn aıqyndaý maqsatynda syndarly dıalogqa qol jetkizý boljanady. Bankter Memorandýmda kózdelgen sharalardy iske asyrý maqsatynda qaryz alýshyny/kepil berýshini jalǵyz baspanasynan shyǵarýdy toqtata turady.

Problemalyq qaryz alýshylardyń máselelerin sheshý jónindegi jumysqa QR Ulttyq Bankiniń aýmaqtyq fılıaldaryn, jergilikti atqarýshy organdardy, bankterdiń fılıaldaryn tartý Memorandým sheńberindegi yntymaqtastyq nysandarynyń biri bolyp tabylady. Osyǵan baılanysty, Memorandýmda oǵan jergilikti atqarýshy organdardyń jáne ózge de múddeli tulǵalardyń qosylý múmkindigi kózdeledi.

Memorandým jarııa etilgen kúnnen bastap qaryz alýshylar úsh aı ishinde osy Memorandým sheńberindegi is-sharalardy iske asyrý jáne bankpen syndarly dıalogty ornatý úshin bankke habarlaýy jáne barýy tıis.

Memorandým qol qoıylǵan kúninen bastap kúshine enedi jáne qol qoıylǵan kúnnen bastap 12 aı búkil respýblıka aýmaǵynda qoldanylady.