Ulttyq bank bıyl aıyrbas baǵamynyń kúrt ózgerýin boldyrmaýǵa nıetti - Q.Kelimbetov
ASTANA. QazAqparat - Ulttyq bank bıyl aıyrbas baǵamynyń kúrt ózgerýin boldyrmaýǵa nıetti. Bul týraly Memleket basshysynyń tóraǵalyǵymen ótken eldiń áleýmettik-ekonomıkalyq damý máseleleri jónindegi keńes barysynda QR Ulttyq bank tóraǵasy Q.Kelimbetov aıtty.
Bul týraly Aqordanyń resmı saıtynan habarlandy.
Ulttyq bank tóraǵasy Q.Kelimbetov ótken jyldyń qorytyndylary men aldaǵy kezeńge arnalǵan makroekonomıkalyq saıasattyń negizgi baǵyttary týraly baıandady.
- 2014 jyly Qazaqstan ekonomıkasynyń beriktigi edáýir nyǵaıdy. Eldiń altyn-valıýta rezervi 102 mıllıard dollarǵa jetti, sonyń ishinde Ulttyq qor 73 mıllıard dollarǵa deıin ósti. «Nurly jol» baǵdarlamasyn júzege asyrýmen birge alǵanda, bul 2015 jylǵa arnalǵan ekonomıkalyq saıasatty senimdi qalyptastyrýǵa múmkindik beredi. Ulttyq bank bıyl aıyrbas baǵamynyń kúrt ózgerýin boldyrmaýǵa nıetti, - dedi Q.Kelimbetov.
Ulttyq ekonomıka mınıstri E.Dosaev negizgi úsh stsenarııdi ázirleý barysynda munaı barreli qunynyń túrlishe nusqasy qarastyrylǵanyn aıtty.
- Búginde Memleket basshysynyń Joldaýda qoıǵan mindetterin júzege asyrýǵa qajetti barlyq quraldar bar. «Nurly jol» baǵdarlamasy bıyl Úkimettiń kontrtsıkldyq ekonomıkalyq saıasatyn iske asyrýdyń negizgi «ózegi» bolady. Sonymen qatar, praktıkalyq sıpattaǵy sharalar jıyntyǵy, sonyń ishinde ónerkásip kásiporyndaryn qoldaýdyń 2015 jylǵa arnalǵan jospary, memleket-jekemenshik seriktestigin damytý, jańa jáne turaqty jumys oryndaryn ashý sharalary ázirlendi, - dedi E.Dosaev.
Óz kezeginde qarjy mınıstri B.Sultanov bıýdjet salasyndaǵy byltyrǵy jyldyń aldyn ala qorytyndylary, fıskaldyq organdar aldynda turǵan 2015 jylǵa arnalǵan mindetter týraly baıandady.
- 2014 jyldyń nátıjeleri boıynsha memlekettik bıýdjettiń ólshemderi oryndaldy. «Nurly jol» baǵdarlamasynyń aıasynda bólinetin qarajat jáne Ulttyq qordan alynǵan 1 trıllıon teńge kózdelgen maqsatqa jetedi. Bul oraıda baqylaýshy jáne salyq organdarynyń jumysy qamtamasyz etiledi, - dedi B.Sultanov.
