Ulttyq bank bazalyq stavkany nelikten 16,75% deńgeıinde saqtap qalǵanyn túsindirdi

ASTANA. QazAqparat – Ulttyq bank tóraǵasy Ǵalymjan Pirmatov bazalyq mólsherlemeni 16,75 paıyz deńgeıinde saqtaý sebebin túsindirdi, dep habarlaıdy QazAqparat tilshisi.

«Ulttyq banktiń aqsha-kredıt saıasaty komıteti bazalyq mólsherlemeni 16,75% deńgeıinde saqtaý týraly sheshim qabyldady. 2022 jyldyń basynan beri jyldyq ınflıatsııa alǵash ret tómendep, naýryzda 18,1 paıyzdy kórsetti. Inflıatsııanyń tómendeýi – kútilgen jaǵdaı jáne Ulttyq banktiń boljamdarynda eskerilgen bolatyn. Aılyq jáne bazalyq ınflıatsııa da tómendeýin kórsetti, biraq áli de joǵary qalpynda qalyp otyr. Aqpanda kúrt tómendep, naýryzda qaıtadan ósken ınflıatsııalyq kútýlerdiń turaqsyzdyq táýekeli ishinara iske asty. Osylaısha, eldegi ınflıatsııalyq protsesterdiń keıbir oń ózgeristeri baıqalyp otyr, biraq ol ózgeristiń barlyǵy turaqty túrde tómendeý sıpatyn bildiredi dep aıtýǵa áli erte. Oń dınamıkaǵa qaramastan, ınflıatsııanyń aılyq kórsetkishi ázirge normadan edáýir asyp tur», - dedi ol.

Onyń atap ótýinshe, bolashaqta ınflıatsııanyń tómendeýin tejeıtin jáne onyń jedeldeý táýekelin arttyratyn ishki jáne syrtqy faktorlar saqtalyp, ishinara iske asyp jatyr.

Janar-jaǵarmaı naryǵynda jáne turǵyn-úı kommýnaldyq sharýashylyq qyzmetterinde baǵa belgileýdiń merzimi jetken reformalary ınflıatsııalyq protsesterge tikeleı jáne janama áser etedi.

Alaıda, orta jáne uzaq merzimdi kezeńde naryqtyq baǵalar ekonomıka sektorlarynyń damýyna jáne ınflıatsııalyq protsesterdiń jaqsyraq boljanýyna oń áser etedi.

«Memlekettik shyǵystardyń ulǵaıýy men fıskaldyq qaǵıdalardy ýaqytsha ustanbaý da proınflıatsııalyq faktorlardy kúsheıtedi. Inflıatsııanyń turaqty tómendeý traektorııasyna qol jetkizý – bizdiń negizgi mindetimiz bolyp qalyp otyr. Osyǵan baılanysty Ulttyq bank buǵan deıin aıtylǵan ustanymyna sáıkes, ınflıatsııalyq protsesterdiń báseńdeýin qoldaý maqsatynda bazalyq mólsherlemeni qazirgi deńgeıde saqtaý týraly sheshim qabyldady. Bizdiń aldaǵy is-áreketterimiz mamyrda jańartylǵan boljam nátıjesinde, onyń ishinde jańa derekter men janar-jaǵarmaı naryǵyndaǵy jáne turǵyn-úı kommýnaldyq sharýashylyǵyndaǵy reformanyń parametrlerine baılanysty bolady», - dedi UB tóraǵasy.