Ulttyq bank bazalyq stavkany 9% deńgeıde saqtaıdy
Bazalyq stavkanyń paıyzdyq dálizi +/- 1 p.t. deńgeıindegi saqtalady. Inflıatsııa deńgeıi Ulttyq banktiń boljamyna sáıkes qalyptasýda. Inflıatsııalyq kútý jyldyq ınflıatsııa deńgeıinde qalyptasty.
«Ulttyq banktiń naqtylanǵan boljamy boıynsha ınflıatsııa jyl sońyna deıin maqsatty dáliz sheginde onyń joǵary shekarasyna jaqyn qalyptasýyn jalǵastyrady. Álemdik shıkizat naryqtarynda táýekelder deńgeıi artýy jáne ósip kele jatqan tutynýshylyq suranys tarapynan ınflıatsııany ulǵaıtatyn qysym kúsheıgen kezde jyldyń sońyna deıin aqsha-kredıt talaptaryn qatańdatý joqqa shyǵarylmaıdy», delingen habarlamada.
Jyldyq ınflıatsııa 4-6% nysanaly dáliz ishinde saqtalýda. Maýsymda tutyný baǵalarynyń 0,2%-ǵa ósýi kezinde jyldyq ınflıatsııa 5,4% deńgeıinde qalyptasty. Azyq-túlik taýarlary baǵasynyń ósýi ınflıatsııanyń ósýine negizgi úlesin qosýdy jalǵastyrýda, olardyń baǵasy jyldyq kórsetý boıynsha 8,2%-ǵa ósti. Baǵanyń ósýi jekelegen ishki taýar naryqtarynda (et jáne et ónimderi, nan-toqash ónimderi men jarmalar) usynys faktorlarynyń yqpalynan, sondaı-aq álemdik azyq-túlik naryqtarynda dándi daqyldar men et ónimderiniń qymbattaýynan boldy.
Azyq-túlikke jatpaıtyn ınflıatsııa 6,1% deńgeıinde saqtaldy. Aqyly qyzmetterge arnalǵan tarıfterdiń jyldyq ósý qarqyny 1,2% eń tómengi deńgeıde qalyptasýyn jalǵastyrýda.
Halyqtyń ınflıatsııalyq kútýleri azyq-túlik naryqtardaǵy baǵalardyń ózgerýine sezimtal bola tura, ósti. Kútiletin ınflıatsııa naqty deńgeıde qalyptasyp, aǵymdaǵy jylǵy mamyrdaǵy 4,7%-ben salystyrǵanda maýsymda 5,4%-dy qurady.
Іshki suranys faktorlary tarapynan ınflıatsııany ulǵaıtatyn qysym baıqalady. Naqty aqshalaı tabystardyń ósýi qańtar-mamyrda 5,5%-dy qurady. Іshki suranystyń keńeıýi áleýmettik qoldaýdyń bıýdjettik baǵdarlamalary keńeıýimen, sondaı-aq qysqa merzimdi tutynýshylyq qaryzdarmen yntalandyrylýda. Bankterdiń tutynýshylyq kredıtteri mamyrda jyldyq kórsetkishte 14,8%-ǵa ósti.
Ekonomıkalyq belsendilikte oń serpin baıqalýda. 2019 jyldyń birinshi jartysynda Qazaqstan ekonomıkasy 4,1%-ǵa ósti. Oń ınvestıtsııalyq belsendilik saqtalýda, 2019 jylǵy qańtar-maýsymda negizgi kapıtalǵa ınvestıtsııa 11,7%-ǵa ósti.
Aldyńǵy sheshimmen salystyrǵanda syrtqy sektordaǵy táýekelder balansy ózgerdi. Jyl basynan bastap Brent markaly munaıdyń ortasha baǵasy 2018 jyl ishindegi bir barreli 72 AQSh dollarymen salystyrǵanda bir barreli 66 AQSh dollar boldy. Halyqaralyq uıymdar álemdik ekonomıkanyń jáne Qazaqstannyń negizgi saýda áriptesteriniń ekonomıkasynyń 2019 jylǵa arnalǵan ósý boljamyn tómendetý jaǵyna qaıta qarady, bul Qazaqstan eksportyna syrtqy suranystyń tómendeýine yqpal etedi. AQSh pen Qytaı arasyndaǵy saýda kelissózderi aıaqtalmady.
Bul rette negizgi saýda áriptes elderdegi ınflıatsııa qalypty deńgeıde qalyptasýda (Reseı men Qytaıda maýsymda tıisinshe 4,7% jáne 2,7%-dy qurady, Eýropalyq Odaqta mamyrda 1,6%-ǵa deıin tómendedi).
Syrtqy monetarlyq jaǵdaılar birtindep jeńildeýde. Buǵan AQSh FRJ-nyń stavkalary traektorııasynyń odan ári tómen bolýyna qatysty rıtorıkasy, sondaı-aq EOB-nyń ekonomıkany yntalandyrýdyń qosymsha sharalary týraly málimdemesi yqpal etti. Reseı Federatsııasynyń Ortalyq banki bıyl maýsym aıynda jyldyń sońyna deıin qosymsha tómendetý múmkindigimen negizgi stavkany 7,5%-ǵa deıin tómendetti.
Bazalyq stavkanyń aǵymdaǵy deńgeıi jáne aqsha-kredıt talaptary ınflıatsııanyń boljamdy kezeńde 4-6% nysanaly dálizdiń joǵarǵy shegi deńgeıinde saqtalýyn qamtamasyz etedi. Inflıatsııa boıynsha maqsatqa qol jetkizý úshin negizgi táýekelderdiń oryndalý yqtımaldyǵy artqan kezde Ulttyq bank jyldyń sońyna deıin bazalyq stavkany kóterý máselesin qaraýǵa daıyn.
Bazalyq stavka boıynsha kezekti sheshim 2019 jylǵy 9 qyrkúıekte Nur-Sultan qalasynyń ýaqytymen saǵat 17:00-de jarııalanady.