Ulttyq bank bazalyq mólsherlemeni saqtap qaldy
ALMATY. QazAqparat–Qazaqstan Ulttyq banki bazalyq mólsherlemeni +/- 1,0 p.t. paıyzdyq dálizben jyldyq 9% deńgeıinde saqtaý týraly sheshim qabyldady, dep habarlaıdy QazAqparat Banktiń baspasóz qyzmetine silteme jasap.
Tıisinshe, ótimdilikti usyný boıynsha turaqty qol jetkizý operatsııalary boıynsha mólsherleme 10,0% jáne ótimdilikti alý boıynsha turaqty qol jetkizý operatsııalary boıynsha mólsherleme 8,0% bolady.
«Sheshim munaı naryǵyndaǵy fýndamentaldy turaqsyzdyqpen, eldegi jáne álemdegi epıdemıologııalyq ahýalǵa, sondaı-aq jappaı vaktsınatsııalaý merzimine baılanysty áli de saqtalyp otyrǵan belgisizdik jaǵdaıynda joǵary jáne álsiz turaqtanǵan ınflıatsııalyq kútýlermen negizdelgen. Inflıatsııalyq kútýlerdiń turaqtanýy 2021-2022 jyldary ınflıatsııa boıynsha maqsatqa qol jetkizý úshin negiz bolyp tabylady, osyǵan baılanysty bazalyq mólsherlemeniń qazirgi deńgeıi 2021 jyldyń sońyna qaraı ınflıatsııa boıynsha 4–6%-dyq maqsatqa qol jetkizýge múmkindik beredi»,– dep habarlady bankten.
2020 jyldyń qarasha aıynda jyldyq ınflıatsııa osy jyldyń maýsym-qazan aralyǵynda 7,0–7,1% deńgeıinde turaqtanǵannan keıin 7,3%-ǵa deıin jyldamdady. Inflıatsııalyq protsesterdiń serpini 4-6% nysanaly dálizinen joǵary qalyptasýdy jalǵastyrýda.
2020 jyldyń qorytyndysy boıynsha Qazaqstandaǵy ınflıatsııa boljamy tómendeý jaǵyna qaraı qaıta qaraldy. 2020 jylǵy jeltoqsanda jyldyq ınflıatsııa qaıta karantın sharalary aıasynda ishki suranystyń neǵurlym aıqyn dezınflıatsııalyq áserine baılanysty 7,3–7,5% aýqymynda kútiledi. Degenmen, ınflıatsııanyń orta merzimdi boljamdary aıtarlyqtaı ózgeristerge ushyraǵan joq – 4-6% nysanaly dáliziniń joǵarǵy shegine qaraı birtindep baıaýlaý 2021 jyldyń sońyna qaraı ǵana bolady.
«Qazaqstan ekonomıkasy 2020 jylǵy 11 aıdyń qorytyndysy boıynsha jyldyq kórsetkishte 2,8%-ǵa qysqardy – ekonomıkalyq belsendiliktiń tómendeýi kútilgennen anaǵurlym tereń bolyp shyqty»,–delingen habarlamada.
Aqsha naryǵyndaǵy turaqty jaǵdaı bazalyq mólsherlemeniń dálizin epıdemııa aldyndaǵy deńgeıge deıin taryltýǵa múmkindik berdi.
«Ulttyq Bank ınflıatsııa serpinine áser etetin ishki jáne syrtqy faktorlarǵa monıtorıng júrgizýdi jalǵastyrady. Bazalyq mólsherleme boıynsha budan keıingi sheshimder ınflıatsııanyń naqty serpininiń onyń nysanaly baǵdarlaryna sáıkestigi, ınflıatsııalyq kútýlerdiń tómendeý jyldamdyǵy, suranystyń qalpyna kelýi, sondaı-aq ınflıatsııalyq táýekelder teńgerimi eskerile otyryp qabyldanatyn bolady.
