Ulttyq Bank bazalyq mólsherlemeni 9% deıin tómendetti

ASTANA. QazAqparat - 4 maýsymda Ulttyq Bank paıyzdyq mólsherlemelerdiń sımmetrııalyq dálizin +/-1% deńgeıinde saqtaı otyryp, bazalyq mólsherlemeni 9% deńgeıine deıin tómendetý týraly sheshim qabyldady. Bul týraly QR UB baspasóz qyzmeti habarlady.

Ótimdilikti berý jáne alý operatsııalary boıynsha mólsherlemeler tıisinshe 10% jáne 8% deńgeıine deıin tómendetildi. Bul jóninde búgin Almaty qalasynda televızııalyq BAQ úshin brıfıngte sóılegen sózinde Qazaqstan Ulttyq Bankiniń Tóraǵasy Danııar Aqyshev habarlady. 

Ol resmı qaıta qarjylandyrý mólsherlemesi bazalyq mólsherleme deńgeıinen keıin 9%-ǵa deıin tómendegenin atap ótti.

Bul sheshim jyldyq ınflıatsııa deńgeıiniń jáne halyqtyń ınflıatsııalyq kútýleriniń odan ári tómendeýine, sondaı-aq munaıdyń álemdik naryqtardaǵy qolaıly úrdistermen baılanysty boldy.

Jyldyq ınflıatsııa mamyrda nysanaly dáliz ishinde tómendeýin jalǵastyrdy jáne 6,2%-dy qurady. Sáýirde Reseı rýbliniń aýytqýlary jáne teńgeniń nomınaldyq aıyrbastaý baǵamynyń álsireýi aıasynda 6,3%-ǵa deıin artýynan keıin mamyrda bir jyl alǵa kútiletin ınflıatsııa 6,0%-ǵa deıin tómendedi. Kútiletin ınflıatsııa jyldyń basynan beri ınflıatsııa deńgeıiniń tómendeýinen basyp ozyp, 1,1 paıyzdyq tarmaqqa tómendedi.

«Bazalyq mólsherlemeniń jańa deńgeıi, bizdiń baǵalaýymyzsha, ınflıatsııanyń aǵymdaǵy jylǵa arnalǵan jáne kelesi jylǵa arnalǵan nysanaly dáliz ishinde saqtalýyna, sondaı-aq 2020  jyldyń sońyna qaraı ınflıatsııa boıynsha 4% bolatyn orta merzimdi baǵdarǵa qol jetkizýge yqpal etetin bolady», - dedi D.Aqyshev.

Bazalyq mólsherleme boıynsha kezekti sheshim 2018 jylǵy 9 shildede Astana qalasynyń ýaqytymen saǵat 17:00-de jarııalanatyn bolady.