Ulttyq bank bazalyq mólsherlemeni 9,75%-ǵa deıin tómendetti

ALMATY. QazAqparat - QR Ulttyq banki +/-1% aýytqý dálizimen bazalyq mólsherlemeni 9,75%-ǵa deıin tómendetý týraly sheshim qabyldady, dep habarlaıdy QazAqparat tilshisi Ulttyq banktiń baspasóz qyzmetine silteme jasap.

Bas bankır Danııar Aqyshev bankterge ótimdilik berý operatsııalary boıynsha mólsherlemelerdiń 10,75%-dy, al ótimdilik alý operatsııalary boıynsha  8,75%-dy quraıtynyn atap ótti.

«Bir jyl buryn 2017 jylǵy qańtarda bazalyq mólsherleme 12% bolǵanyn eske sala keteıin. Bazalyq mólsherlemeni tómendetý týraly sheshim 2017 jylǵy oń nátıjelerge baılanysty bolyp otyr. Sondaı-aq, 2018  jyly ekonomıkalyq ahýaldyń ońtaıly damýy kútilip otyr. Bul sheshim Ulttyq banktiń ınflıatsııany 2018 jyly 5-7% jańa nysanaly dáliz sheginde, 2020 jylǵa qaraı 4%-ǵa jetkizýge múmkindik beredi. Biz aqsha naryǵyndaǵy daǵdarysqa qarsy basqarý kezeńinen ınflıatsııa boıynsha túpkilikti maqsatqa jetýdegi aqsha-kredıt saıasaty transmıssııalyq mehanızminiń pármendiligin qalpyna keltirý men kúsheıtýge ótemiz», - dedi D. Aqyshev.

Ulttyq bank basshysy 2018 jyly bazalyq mólsherlemeniń odan ári tómendeýi yqtımal ekendigin aıtty.

«Eger saýda talaptary jáne saýda boıynsha áriptes elderdegi jaǵdaı oń bolsa, 2017 jyly Qazaqstan ekonomıkasynda ahýaldyń jaqsarýyna yqpal etken úrdis aǵymdaǵy jyly da jalǵassa jáne tutastaı alǵanda ınflıatsııanyń boljamdyq jáne naqty serpini bir-birine sáıkes kelse, aqsha-kredıt saıasaty jumsarady», - dedi ol.

Bazalyq mólsherleme boıynsha kezekti sheshim 2018 jylǵy 5 naýryzda Astana ýaqytymen saǵat 17:00-de jarııalanady.