Ulttyq bank bazalyq mólsherlemeni 9,25 paıyz deńgeıinde saqtap qaldy
ASTANA. QazAqparat - QR Ulttyq banki bazalyq mólsherlemeni 9,25 paıyz deńgeıinde saqtady, dep habarlaıdy QazAqparat.
«Qazaqstan Respýblıkasynyń Ulttyq banki bazalyq mólsherlemeni paıyzdyq mólsherlemelerdiń +/-1 p.t. ózgermeıtin dálizimen 9,25% deńgeıde saqtaý týraly sheshim qabyldady», - dep atap ótilgen UB baspasóz qyzmetiniń málimetinde.
Belgili bolǵandaı, jyldyq ınflıatsııa tómendeýin jalǵastyrdy jáne aqpanda nysanaly dálizdiń ortasynan tómen qalyptasty.
«Bazalyq mólsherlemeniń aǵymdaǵy deńgeıi 2019 jylǵa ınflıatsııa boıynsha nysanaly baǵdarlarǵa qol jetkizý yqpal etedi», - deıdi Ulttyq bank ókilderi.
Sonymen birge, jyldyq ınflıatsııa 2019 jylǵy qańtarda jáne aqpanda nysanaly dálizdiń ortasynda qalyptasyp, sáıkesinshe 5,2% jáne 4,8%-ǵa deıin tómendedi. Muny tutyný baǵalarynyń ındeksi negizin quraýshylardyń túrli baǵyttaǵy serpini kórsetip otyr.
«Azyq-túlik taýarlarynyń ınflıatsııasy aıtarlyqtaı ósti (2018 jylǵy jeltoqsandaǵy 5,1%-dan 2019 jylǵy aqpandaǵy 6,6%-ǵa deıin), bul jemis jáne kókónis ónimderin qospaǵanda, is júzinde barlyq taýar pozıtsııalary boıynsha baıqaldy. Aqyly qyzmet kórsetý baǵasynyń tómendeýi jyldyń birinshi eki aıynda (tıisinshe 0,2% jáne 1,3%) tabıǵı monopolııalar qyzmetiniń tarıfterin arzandatý boıynsha ákimshilik sharalardyń kúsheıýine sebepshi boldy. Nátıjesinde, tutyný baǵasy ındeksiniń servıstik quramdaýyshynda jyldyq ózgerýiniń jyl basynan beri 4,5%-dan 1,3%-ǵa deıin tómendeýine ákeldi», - delingen habarlamada.
Azyq-túlikke jatpaıtyn taýarlardyń ınflıatsııasy baıaýlaýyn jalǵastyrýda jáne aqpanda jyldyq kórsetkish boıynsha 6,2%-ǵa jetti.
