Ulttyq Bank bazalyq mólsherlemeni 9,25% deıin tómendetti
ASTANA. QazAqparat - 16 sáýirde Ulttyq Bank paıyzdyq mólsherlemelerdiń sımmetrııalyq dálizin +/-1% mólsherinde saqtaı otyryp, bazalyq mólsherlemeni 9,25%-ǵa deıin tómendetý týraly sheshim qabyldady. Tıisinshe, ótimdilik berý operatsııalary boıynsha mólsherlemeler 10,25%, al ótimdilikti alý operatsııalary boıynsha 8,25% boldy. Bul týraly búgin Almaty qalasynda televızııalyq BAQ-qa arnalǵan brıfıngte sóılegen sózinde Ulttyq Bank Tóraǵasy Danııar Aqyshev habarlady.
Ol resmı qaıta qarjylandyrý mólsherlemesi 9,25%-ǵa deıin tómendetilgenin atap ótti.
«Bul bazalyq mólsherlemeniń osy jyly úshinshi ret tómendeýi. Bul sheshim orta merzimdi baǵalaýǵa negizdeldi, onda ınflıatsııanyń aǵymdaǵy jyldyń sońyna deıin jáne kelesi jyly baıaýlaýy, tómendeıtin ınflıatsııalyq kútýler, sondaı-aq syrtqy naryqtarda tutastaı alǵanda jaǵymdy ahýaldyń saqtalýy boljandy», - dedi D.Aqyshev.
Ol aldyńǵy aptada Reseıdiń qor jáne valıýta naryqtaryndaǵy qubylmalylyqqa qaramastan, syrtqy sektordyń orta merzimdi kezeńde irgeli faktorlarynyń áseri oń dep baǵalanatynyn atap ótti.
Bazalyq mólsherleme boıynsha kezekti sheshim 2018 jylǵy 4 maýsymda, Astana ýaqytymen saǵat 17:00-de jarııalanatyn bolady.
