Ulttyq bank bazalyq mólsherlemeni 13,0%-ǵa deıin tómendetti
ASTANA. QazAqparat - Qazaqstan Respýblıkasynyń Ulttyq banki bazalyq mólsherlemeni +-1% dálizben 13,0%-ǵa deıin tómendetý týraly sheshim qabyldady, dep habarlady UB baspasóz qyzmeti.
Inflıatsııa tolyq kólemde Ulttyq banktiń boljamdaryna sáıkes keledi, aǵymdaǵy jaǵdaılar saqtalǵan kezde ınflıatsııalyq úderisterdiń jedeldeý táýekelderi barynsha tómen, bul edáýir yqtımaldylyqpen 2016 jyldyń sońyna qaraı ınflıatsııanyń nysanaly dálizdiń 6-8% joǵary shegine jetýin kútýge múmkindik beredi. Bir jylǵa baǵalanatyn bazalyq mólsherlemeniń ınflıatsııaǵa áser etýiniń ýaqytsha aralyǵyn nazarǵa ala otyryp, bazalyq mólsherlemeni tómendetý týraly sheshim ınflıatsııany aldaǵy 12 aıda jáne 2017 jyldyń sońyna deıin kórsetilgen nysanaly dálizdiń sheginde saqtaýdaǵy senimdilikti rastaıdy.
Bazalyq mólsherleme boıynsha sheshim mynadaı faktorlardy eskere otyryp qabyldandy.
Syrtqy naryqtaǵy oń úrdister qolma-qol shetel valıýtasy naryǵynda, sol sııaqty bank depozıtteri naryǵynda valıýtalyq aktıvterdiń teńgedegi aktıvterge aýysýy jónindegi sońǵy 4 aıdaǵy úrdistiń jalǵasýyna yqpal etýde.
2016 jylǵy mamyr-maýsymdaǵy munaıdyń álemdik naryqtaryndaǵy baǵalary kútkendegiden áldeqaıda joǵary deńgeıde qalyptasty. Ulybrıtanııadaǵy Eýropalyq odaqtan shyǵý jónindegi referendýmnyń nátıjeleri qarjy naryqtaryndaǵy qysqamerzimdi týrbýlenttiliktiń ósýine ákeldi, alaıda Ulybrıtanııanyń Eýroodaqtan shyǵýynan tikeleı táýekelder Qazaqstan úshin shekteýli retinde baǵalanýda.
Іshki valıýta naryǵyndaǵy ahýal turaqty, valıýtalyq táýekelderge qatysty jaǵymsyz kútýler tómendeýde. Ulttyq banktiń baǵalaýynsha, teńge baǵamy irgeli syrtqy jáne ishki faktorlardyń úılesýin kórsetti, muny onyń sońǵy aılar ishinde shamaly ózgerýi jáne Ulttyq banktiń ishki valıýta naryǵyna qatysý deńgeıi rastap otyr.
Aqsha naryǵynda ótimdiliktiń qurylymdyq profıtsıti baıqalýda, osyǵan oraı Ulttyq bank artyq ótimdilikti alý operatsııalaryn belsendi túrde júrgizýin jalǵastyrýda. Tómen kredıttik belsendilik jáne kredıttik resýrstarǵa degen suranys ınflıatsııalyq úderisterdiń jyldamdaý táýekelderin shekteı otyryp, oǵan ekonomıkanyń naqty sektoryna aýysýyna múmkindik bermeıdi.
Іs júzindegi ınflıatsııa máni Ulttyq banktiń baǵalaýymen sáıkes keledi. 2016 jylǵy birinshi jartyjyldyqta onyń deńgeıi 4,6%-dy, maýsymda 0,4%-dy qurady. Halyqtyń ınflıatsııalyq kútýleri jáne kásiporyndardyń monıtorıngi boıynsha suratýlarǵa sáıkes naqty sektor kásiporyndarynyń tutyný taýarlaryna jáne daıyn ónimine baǵa ósýiniń barynsha qalypty qarqyndary kútilýde. Negizgi saýda áriptes elderdegi ınflıatsııa báseńdeýde. Eldegi ekonomıkalyq belsendiliktiń tómen deńgeıde saqtalýy tejeýshi faktor bolyp qalýda.
Bazalyq mólsherleme boıynsha keıingi is-áreketter ınflıatsııa boıynsha is júzindegi derekterge, olardyń boljamnan aýytqýyna, halyq pen naryqtyń ınflıatsııalyq kútýlerine, sondaı-aq ekonomıka sýbektileriniń valıýtalyq basymdyqtaryna baılanysty bolady. Bazalyq mólsherlemeniń yqtımal tómendeýi ınflıatsııa deńgeıiniń nysanaly dıapazonǵa jaqyndaýyn kýálandyratyn ornyqty belginiń bolýyna negizdeletin bolady. Bazalyq mólsherleme boıynsha kelesi sheshim 2016 jylǵy 15 tamyzda Astana qalasynyń ýaqyty boıynsha 17.00-saǵatta jarııa etiletin bolady.
