Ulttyq bank «Báıterek» holdınginiń ınfraqurylymdyq oblıgatsııalaryn satyp almaq
NUR-SULTAN. QazAqparat - Ulttyq bank «Báıterek» holdınginiń ınfraqurylymdyq oblıgatsııalaryn satyp alady. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
Ulttyq bank daǵdarysqa qarsy sharalardyń ekinshi toptamasy aıasynda mynadaı baǵyttar boıynsha jumys júrgizýde. Memleket basshysynyń bıylǵy 31 naýryzdaǵy tapsyrmasyna sáıkes «Qarapaıym zattar ekonomıkasy» baǵdarlamasy aıasynda 1 jyldyq merzimmen kóktemgi egis jumystaryn júrgizýge 100 mlrd teńge bólinedi. Baǵdarlamaǵa qatysýshylardyń oblıgatsııalaryn óteý merzimi 7 jyldan 10 jylǵa deıin ulǵaıtylady», - dedi UB tóraǵasy.
Onyń aıtýynsha, daǵdarysqa qarsy sharalardyń ekinshi toptamasy aıasynda Ulttyq bank «Báıterek» UBH» AQ-nyń ınfraqurylymdyq oblıgatsııalaryn satyp alý arqyly 700 mlrd teńgege deıin keńeıtý múmkindigimen 600 mlrd teńge somasyna iskerlik belsendilik jáne jumyspen qamtýdy qoldaý sharalaryn qarjylandyrý máselesin qarastyryp jatyr.
«Bul qarajat jergilikti atqarýshy organdardy odan ári qarjylandyrý úshin jumsalady jáne Jumyspen qamtý jol kartasyn iske asyrý úshin respýblıkalyq bıýdjetten transfertpen jergilikti bıýdjetterge 300 mlrd teńge bólingennen keıin beriletin bolady», - dedi Erbolat Dosaev.
