Ulttyq bank basshysy el ekonomıkasynyń bıylǵy ósimine boljam jasady

NUR-SULTAN. QazAqparat – QR Ulttyq banki el ekonomıkasynyń bıylǵy ósimin 3,9-4,2 paıyz deńgeıinde boljaıdy. Bul týraly Úkimettiń keńeıtilgen otyrysynda QR Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Halyqaralyq valıýta qorynyń baǵalaýy boıynsha, 2021 jyly jahandyq ishki jalpy ónimniń ósý qarqyny 40 jyldan astam ýaqyt ishinde eń jyldam bolyp, 5,9 paıyzdy qurady. 2022 jyly ekonomıkanyń qalpyna kelýi jalǵasady. Biraq ósý qarqyny tómendep, Halyqaralyq valıýta qorynyń boljamdary boıynsha 4,4 paıyzdy quraıdy. Halyqaralyq uıymdardyń baǵalaýy boıynsha, Qazaqstan ekonomıkasy 2022 jyly 3,7-4,0 paıyzǵa ósedi, Ulttyq bank ony 3,9-4,2 paıyz deńgeıinde boljap otyr», - dedi ol.

Ulttyq bank tóraǵasynyń atap ótýinshe, shamadan tys suranys týdyrǵan álemdik ekonomıkanyń tez qalpyna kelýi aıasynda 2021 jyly shıkizat, materıaldar men azyq-túlik baǵasy eń joǵary deńgeıge jetti. Bul energetıkalyq daǵdaryspen birge álemniń kóptegen elderinde rekordtyq ınflıatsııaǵa alyp keldi.

«Halyqaralyq uıymdar qysqa merzimdi kezeńde dısbalanstar aıaqtalsa, 2022 jyldyń ortasyna taman baǵanyń turaqtanýyn boljaýda. Taýar jetkizýdegi barynsha uzaq toqtap qalýlar jáne shıkizat pen azyq-túlik baǵasynyń ósýi jalǵassa, ınflıatsııanyń turaqtanýyna uzaq ýaqyt kerek bolady. Údep kele jatqan ınflıatsııalyq qysymdy tejeý aıasynda ortalyq bankter aqsha-kredıt talaptaryn kúsheıte bastady. Ol 2022 jyly belsendi túrde jalǵasatyn bolady jáne qazirdiń ózinde naryqtarǵa qysym kórsetýde. Syrtqy jáne ishki ınflıatsııalyq qysymnyń kúsheıýi kezinde Ulttyq bank 2021 jyldyń ortasynan bastap bazalyq stavkany úsh ret 9,75 paıyzǵa deıin 75 bazalyq tarmaqqa ósirdi», - dedi Ǵalymjan Pirmatov.