Ulttyq bank ázirshe ulttyq tólem júıesin qurý týraly máseleni qarastyryp otyrǵan joq
ASTANA. QazAqparat - Ulttyq bank ázirshe ulttyq tólem júıesin qurý týraly máseleni qarastyryp otyrǵan joq. Búgin Májilistiń jalpy otyrysynda QR Ulttyq bank tóraǵasy Danııar Aqyshev osylaı málim etti. Basqosýda «Tólemder men tólem júıesi týraly» zań jobasy birinshi oqylymda talqylanǵan bolatyn.
«Ulttyq bank bankaralyq júıe qurýǵa quqyly, buǵan bankter arasyndaǵy Qazaqstan ishinde kartochkalyq tranzaktsııany basqarý da kiredi. Bul durys baǵyt. Sonymen qatar, Ulttyq bank osy naryqta qatysýdy durys sanaıdy. Alaıda, qazirgi kezde Ulttyq bank qandaı da bir jeke ulttyq tólem júıesin qurý týraly máseleni qarastyryp otyrǵan joq», - dedi depýtattar saýalyna jaýap bergen D. Aqyshev.
Onyń aıtýyna qaraǵanda, qaýipsizdik turǵysynan, tutynýshylardyń quqyqtaryn qorǵaý turǵysynan alǵanda Ulttyq bank tólem naryǵy júıesine qatysýy kerek. «Al Ulttyq banktiń ekinshi deńgeıli banktermen ózara qarym-qatynasy máselelerine kelsek, bul másele áli talqylanyp jatyr. Biz Úkimetpen birlese otyryp, belgili bir qorytyndyǵa kelemiz dep oılaımyn, Onyń nátıjesinde Parlamentke arnaıy ózgeristermen de kelýimiz múmkin. Sondyqtan da, qazirgi tańda qandaı da bir ulttyq tólem júıesin qurý týraly áńgime aıtý erterek. Al negizgi áńgime tek osy naryqqa Ulttyq banktiń qatysýyna baılanysty tehnıkalyq máseleler turǵysynda bolyp otyr», - dedi Bas bankır.
Degenmen, UB basshysy keleshekte Qazaqstannyń jeke ulttyq tólem júıesin engizý máselesi de joqqa shyǵarylmaıtynyn málimdedi. «Ulttyq tólem kartasy sekildi ulttyq tólem júıesin engizý joqqa shyǵarylmaıdy. Bolashaqta osy máselege aınalyp soǵýymyz múmkin. Óıtkeni, qazirgi tańda túrli elder sanktsııaǵa ushyrap jatyr. Bundaı táýekelderdi eskermeýge bolmaıdy. Sondyqtan da, bizge de bir qaýipsiz ári qosymsha býfer bolýy kerek dep oılaımyn. Árıne, men olaı bolmaýyn tileımin. Qazirgi júıemiz halyqtyń múddelerinen shyǵady», - dedi ol.
