Ulttyq bank altyn quımalaryn shetelde paıdalanýǵa bola ma
ASTANA. QazAqparat - Ulttyq bank shyǵarǵan altyn quımalaryn shetelge alyp shyǵýǵa bolady. Bul týraly búgin QR Ulttyq banki Astana fılıalynyń dırektory Ámirbek Sanqybaev málim etti, dep habarlaıdy QazAqparat.
QR Ulttyq bankiniń halyqqa arnalǵan tazartylǵan altyn quımalaryn satý jáne satyp alý baǵdarlamasyna qatysty uıymdastyrylǵan baspasóz máslıhaty barysynda BAQ ókilderi Sanqybaevtan el azamattary altyn quımalaryn shetelge alyp shyǵyp, qarjy tetigi retinde qoldana ala ma dep suraǵan edi.
«Mundaı másele bizde de kóterilgen bolatyn. Usynystar bar. Biz zańgerlermen qosymsha keliskennen keıin aıtatyn bolamyz. Biraq, meniń bilýimshe, oǵan shekteý qoıylmaǵan, qaıta qoldaý bildiredi. Sondyqtan qandaı da bir zańdyq shekteý kórip otyrǵanymyz joq», - dep jaýap berdi fılıal basshysy.
Aıta keterligi, baǵdarlama alǵash tanystyrǵan kúni quımanyń 10 gramy - 127 myń teńge, 20 gramm - 254 myń teńge, 50 gramm - 635 myń teńge, 100 gramm - 1 mln 270 myń teńge turǵan bolatyn. Al búgin 10 gramdyq quımanyń quny 2 myń teńgege qymbattap 129 myń teńgeden asyp jyǵyldy.
Eskererlik jaıt, ólshengen altyn quımalar arnaıy qorǵanysh vakýýmdy oraýda shyǵarylady. Oraýdyń bútindigi altyn quımany usynǵan kezde bank ony qandaı da bir uzaq saraptamasyz satyp alýǵa mindetti bolatynyn bildiredi. Oraý ashylǵan jaǵdaıda bank bul quımany ınkassoǵa qabyldaıdy, ıaǵnı Ulttyq Bank saraptama júrgizgennen keıin ǵana esep aıyrysady. Al bul uzaq ýaqytty jáne qosymsha komıssııany tóleýdi talap etedi.
