Ulttyq Bank Almatydaǵy HVQ óńirlik ortalyǵy Úılestirý komıtetiniń otyrysyna qatysty

NUR-SULTAN. QazAqparat - Qazaqstan Ulttyq Banki Halyqaralyq valıýta qory janyndaǵy Kavkaz, Ortalyq Azııa jáne Mońǵolııa elderi úshin áleýetti damytý óńirlik ortalyǵy Úılestirý komıtetiniń ekinshi otyrysyna qatysty, dep habarlaıdy QazAqparat QR Ulttyń Bankiniń baspasóz qyzmetine silteme jasap.

Úılestirý komıtetiniń quramyna óńir elderiniń (Armenııa, Ázirbaıjan, Grýzııa, Qazaqstan, Qyrǵyzstan, Mońǵolııa, Tájikstan, Túrikmenstan, Ózbekstan), seriktester men donorlar ókilderi, sondaı-aq HVQ ókilderi kiredi. Bıyl Komıtetke Qazaqstan Ulttyq Banki Tóraǵasynyń orynbasary Álııa Moldabekova basshylyq etedi.

Úılestirý komıtetiniń músheleri onlaın-kezdesý barysynda 2022 jyldyń sáýir aıyna deıingi jumys josparyn bekitti. Ortalyq óńir elderi úshin makroekonomıka, memlekettik qarjyny basqarý, aqsha-kredıt saıasaty, qarjy naryǵyn retteý, statıstıka sııaqty baǵyttar boıynsha HVQ-nyń birqatar konsýltatsııalyq jobalaryn uıymdastyrýdy josparlap otyr.

Konsýltatsııalyq jobalar álemdik ozyq tájirıbe men HVQ saraptamasy eskerile otyryp, 2021 jyldyń aqpanynan bastap júrgiziledi. Sonymen qatar Ortalyq 2020 jylǵy shildeden bastap tájirıbe almasý úshin qysqa merzimdi jobalar – semınarlar men vebınarlardy da iske asyrady. Atap aıtqanda, Ulttyq Banktiń qyzmetkerleri 12 vebınar men 3 óńirlik is-sharaǵa spıker ári tyńdaýshy retinde qatysty.

Osyndaı uıymnyń óńirde ornalasýy aımaqtaǵy barlyq múddeli elder úshin úzdik halyqaralyq tájirıbege jol ashady jáne adam kapıtalyn damytýǵa, memlekettik basqarý tájirıbesine eleýli úles qosady.

Úılestirý komıtetiniń kelesi otyrysy 2021 jyly 7 jeltoqsanda ótedi.