Ulttyq bank aqsha-kredıt saıasatyna qatysty strategııany bekitti
Onyń aıtýynsha, Memleket basshysy 2020 jyldyń 1 qyrkúıegindegi Joldaýynda «aqsha-kredıt saıasatyn jańadan qaraý» mindetin atady. Osy tapsyrmany iske asyrý úshin júrgizilip otyrǵan aqsha-kredıt saıasatynyń tıimdiligin arttyrý maqsatynda Ulttyq bank aqsha-kredıt saıasatynyń 2030 jylǵa deıingi strategııasyn ázirledi. Strategııa 2025 jylǵa deıingi ulttyq damý jospary sııaqty eldiń uzaq merzimdi qujattarymen úılestirildi.
«Bizdiń negizgi maqsat – baǵa turaqtylyǵyn qamtamasyz etý. Inflıatsııalyq targetteý rejımine ótkennen keıin jyl saıyn aqsha-kredıt saıasatynyń negizgi baǵyttary qabyldandy, olarda júrgizilip otyrǵan saıasattyń aldaǵy jylǵa arnalǵan basymdyqtary aıqyndaldy. Endi Strategııada uzaq aralyqqa paıym qalyptastyryldy, Qazaqstandaǵy sııaqty basqa da elderdegi ınflıatsııalyq targetteýge ótýdiń tájirıbesi taldandy, sondaı-aq transmıssııalyq tetiktiń tıimdiligin shekteıtin aǵymdaǵy kedergiler qaraldy», - dedi Aqyljan Baımaǵambetov.
Aqpanda qabyldanǵan eldiń 2025 jylǵa deıingi ulttyq damý josparyn eskere otyryp, Strategııada kedergilerdi joıýǵa jáne tolyqqandy ınflıatsııalyq targetteý rejımine ótýdi aıaqtaýǵa múmkindik beretin negizgi basymdyqtar kórsetildi.
«Biz halyqaralyq qarjy ınstıtýttarymen, sonyń ishinde HVQ, Dúnıejúzilik Bank, EQDB-men, sondaı-aq qazaqstandyq sarapshylarmen, Qazaqstannyń qarjygerler qaýymdastyǵymen jáne bank sektorynyń ókilderimen Strategııa jobasyn talqylaý boıynsha birneshe raýnd ótkizdik. Olardyń qorytyndysyna saı qujat tolyqtyrylyp, pysyqtaldy», - dedi ol.
Sonymen qatar ol ınflıatsııalyq targetteýdiń tolyqqandy rejımine kóshý boıynsha qajetti sharalar týraly aıtyp berdi.
2015 jyly ınflıatsııalyq targetteý rejımine kóshken sátten bastap Ulttyq bank onyń «tórt tirek» dep atalatyn negizgi elementterin engizdi. Bul ózgermeli valıýta baǵamy, paıyzdyq saıasat, ashyq baılanys, taldaý jáne boljaý júıesi.
«Soǵan qaramastan, engizilgen rejımdi «ótpeli» dep sıpattaýǵa bolady, óıtkeni qurylymdyq shekteýler bar, nátıjesinde aqsha-kredıt saıasatynyń eldegi ınflıatsııalyq protsesterge áseri álsiredi. Bul kóbine ekonomıkanyń tómen ártaraptandyrylýymen, ımportqa táýeldiliktiń joǵary bolýymen, qarjy naryǵynyń jetkilikti damymaýymen, jeńil fıskaldyq shekteýler kezindegi memlekettik kredıtteýdiń belsendi bolýymen baılanysty. Halyqaralyq tájirıbede mundaı rejım «light IT» dep atalady. Atalǵan syn-qaterlerdi eńsere otyryp, biz ekonomıkanyń túrli táýekelderge ushyraýynyń tómendeýin jáne sonyń saldarynan aqsha-kredıt saıasatynyń ınflıatsııaǵa áseriniń kúsheıýin kútemiz. Osylaısha, biz ınflıatsııalyq targetteýdiń tolyq nemese «full-fledged» rejımine qol jetkize alamyz. Bul qabyldanatyn sheshimderdiń tıimdiligin arttyrýǵa jáne ekonomıkanyń ornyqty damýy úshin bazalyq artyqshylyqtarǵa qol jetkizýge múmkindik beredi», - dep túsindirdi UB ókili.
Munymen qosa, Aqyljan Baımaǵambetov Strategııa aıasyndaǵy jumystyń negizgi baǵyttaryn aıtty.
«Qazirgi bar syn-qaterlerdi eńserip, aqsha-kredıt saıasatynyń tıimdiligin arttyrý úshin biz monetarlyq negizderdi kúsheıtý, qarjy sektoryn odan ári damytý, sondaı-aq eldiń makroekonomıkalyq saıasaty salasyndaǵy is-qımyldardy úılestirý jónindegi basym mindetterdi qamtıtyn úsh basty baǵytty bólip kórsetemiz», - dedi ol.