Ulttyq bank aqsha-kredıt saıasatyn kúsheıtýge qatysty túsinikteme berdi
«Inflıatsııany maqsatty dálizge qaıtarý úshin bizge bir mezgilde eki baǵyt boıynsha áreket etý qajet. Birinshiden, bul – Ulttyq banktiń orta merzimdi keleshekte ınflıatsııa boıynsha maqsatty kórsetkishterge qol jetkizýge barynsha kúsh salýy. Inflıatsııany josparly túrde tómendetý úshin Ulttyq bank paıyzdyq saıasatqa basa nazar aýdara otyryp aqsha-kredıt saıasatyn jalǵastyrady. Ulttyq banktiń paıyzdyq saıasaty naryqtyq mólsherlemelerdi bazalyq mólsherlemeniń maqsatty dálizi sheginde ustap turýǵa baǵyttalady»,- dedi A. Baımaǵambetov suhbat bere otyryp.
Sondaı-aq, tóraǵa orynbasary Ulttyq bankte aqsha naryǵyndaǵy paıyzdyq mólsherlemelerdi retteýge arnalǵan aqsha-kredıt saıasaty quraldarynyń tutas jıyntyǵy baryn aıtty.
«Onyń ishinde bazalyq mólsherleme negizgisi bolyp otyr. Qazirgi ýaqytta paıyzdyq arnanyń ınflıatsııalyq protsesterge áseri áli de shekteýli ekenin moıyndaý kerek jáne biz onyń tıimdiligin arttyrýǵa umtylamyz. Aqsha-kredıt saıasatynyń 2030 jylǵa deıingi strategııasynda biz monetarlyq negizderdi kúsheıtýge, qarjy naryǵyn damytýǵa baǵyttalǵan birqatar bastamalardy jáne makroekonomıkalyq saıasattyń tıimdiligin arttyrý úshin qurylymdyq reformalardy kózdedik. Ekinshi baǵyt - buǵan deıin aıtqanymyzdaı, negizinen aqsha-kredıt saıasatynyń yqpalynan tys jatqan usynys jaǵynan kóptegen faktorlar bar», - deıdi ol.
Onyń sózinshe, ınflıatsııanyń nysanaly kórsetkishine qol jetkizý úshin Úkimet tarapynan júıeli sharalardy qabyldaý talap etiledi.
Odan bólek, A. Baımaǵambetov ekonomıkany ártaraptandyrý, tutyný naryǵyn otandyq taýarlarmen toltyrý, shıkizatqa jatpaıtyn eksportty keńeıtý, sondaı-aq fıskaldyq tártipti arttyrý mindet ekenin basa aıtty.
Jáne Ulttyq bank ókili ınflıatsııaǵa qarsy áreket etý sharalary keshenin qabyldaý jumysy Memleket basshysynyń bıylǵy 10 shildede Úkimettiń keńeıtilgen otyrysynda bergen tapsyrmasyna sáıkes júrgizilip jatqanyn alǵa tartty.
«Úkimet pen Ulttyq banktiń tıisti sharalardy birlesip iske asyrýy – baǵa ósimin baqylaýdy kúsheıtýge jáne 2022 jyly ınflıatsııany maqsatty dáliz deńgeıine deıin tómendetýge múmkindik beredi. Bul rette Memleket basshysy tapsyrǵan bizdiń orta merzimdi mindetimiz – 2025 jyly 3-4% ınflıatsııaǵa qol jetkizý», - deıdi Ulttyq bank basshysynyń orynbasary.
Aıta keteıik, QR Ulttyq banki tóraǵasynyń orynbasary Aqyljan Baımaǵambetov QazAqparat tilshisine eksklıýzıvti suhbat berdi.
Suhbat barysynda biz Ulttyq bank basshysynyń orynbasarynan elde qalyptasqan qazirgi ekonomıkalyq jaǵdaı, oǵan qatysty qolǵa alynyp jatqan sharalar týraly surap bilgen edik.
