Ulttyq bank 2020 jylǵa deıin ınflıatsııany 4 paıyz dálizinde ustap turýǵa múddeli
ASTANA. QazAqparat - Ulttyq bank 2020 jylǵa deıin ınflıatsııany 4 paıyz dálizinde ustap turýǵa múddeli. Búgin Parlament Senatynyń jalpy otyrysynda 2015 jylǵy bıýdjettiń atqarylýy týraly Úkimettiń esebin talqylaý barysynda baıandama jasaǵan QR Ulttyq banki tóraǵasynyń orynbasary Alpysbaı Ahmetov osylaı málim etti.
UB ókiliniń aıtýynsha, ınflıatsııaǵa áser etetin negizgi faktorlarda turaqtylyq bar. Atap aıtqanda, teńge baǵamy salystyrmaly túrde turaqty bolyp saqtalýda. Importtyq ónimge baǵanyń ózgerýi de barynsha tómen. Sonymen qatar, jalaqynyń naqty deńgeıiniń tómendeýi tutynýshylyq suranysty shektep otyr. «Ekonomıkadaǵy iskerlik belsendilik tómen deńgeıde saqtalýda. Reseıdegi tómen ınflııatsııa aıasynda kórshi elden keletin taýarlarmen básekelestik qatańdatylýda. Sonymen qatar, tabıǵı monopolııalar qyzmetterine qatysty saıasat ınflıatsııanyń baıaýlaýyna yqpal etetin bolady», dedi A. Ahmetov.
Onyń aıtýynsha, UB sharalary orta merzimdi kezeńdegi ınflıatsııaǵa áser etetin bolady. «Sondyqtan da, biz 2017 jylǵa boljam jasap, 2020 jylǵa deıin ınflıatsııanyń 4 paıyzdan tómen deńgeıine boljam jasaımyz. Bul bizdiń maqsatymyz, oǵan qol jetkizý úshin bar kúshti salamyz. Nátıjesinde qazaqstandyq kásipkerler ınflıatsııany jáne tıisinshe bolashaqtaǵy baǵa deńgeıiniń qalaı bolatynyn túsine otyryp, bolashaqqa arnalǵan ınvestıtsııa týraly sheshimder qabyldaı alady», dedi UB ókili.
