Ulttyq aza tutýǵa baılanysty Astanada jetim jáne daryndy balalarǵa arnalǵan Jańajyldyq shyrsha merekeleri bolmaıdy
ASTANA. 27 jeltoqsan. QazAqparat - 27 jeltoqsan Qazaqstan Respýblıkasynda jalpyulttyq aza tutý kúni bolyp jarııalanýyna baılanysty
Astana qalasynda balalar úıleri men mektep-ınternattardyń tárbıelenýshilerine jáne daryndy balalarǵa arnap, ákimdik atynan uıymdastyrylýy tıis dástúrli Jańajyldyq shyrsha merekeleri bolmaıdy.
Qala ákimdiginen anyqtaǵandaı, saǵat 11.00-de jáne 15.00-de Oqýshylar saraıynda ótýi tıis bolǵan merekeler erteńge aýystyryldy.
Buǵan deıin habarlanǵandaı, ústimizdegi jyldyń 25 jeltoqsanynda saǵat 18. 55-te Shymkent qalasynyń mańynda QR UQK Shekara qyzmetiniń áskerı-kólik ushaǵy apatqa ushyrady.
Ushaq bortynda bolǵan barlyq 27 adam, sonyń ishinde 7 ekıpaj múshesi qaza tapty. Qaza tapqandardyń ishinde Shekara qyzmetiniń dırektory polkovnık Stambekov T.M. jáne Qyzmet ortalyq apparatynyń bir top ofıtserleri, sondaı-aq ú.j. 25 jeltoqsanda Astana qalasynda Shekara qyzmeti Áskerı keńesiniń jınalysyna qatysqan «Ońtústik» óńirlik basqarmasynyń áskerı qyzmetshileri bar.
Shekara qyzmetiniń basshylyǵy Shymkent qalasyna «Ońtústik» óńirlik basqarmasynda ótken jyldyń qorytyndysyn shyǵarý boıynsha Áskerı keńes ótkizý úshin ushyp shyqqan.
