Ulttyq aýdarma bıýrosynyń joba basshysy «100 oqýlyqtyń» tórt artyqshylyǵyn atady
«Mundaı ǵylymı aýdarma jumysy Qazaqstanda buryn sońdy bolmaǵan. 100 oqýlyqty aýdarý aıasynda Qazaqstan álemdegi aldyńǵy qatarly JOO-lardaǵy bilim berý oryndary, ǵylymı ortalyqtar men oqýlyqtar shyǵarýǵa mamandanǵan baspa uıymdarymen tyǵyz áriptestik ornatpaq. Qazirdiń ózinde biz álemniń 15-ke jýyq baspa úılerimen tikeleı áriptestik ornattyq», - deıdi Álibek Qısybaı QR Tuńǵysh Prezıdenti - Elbasy Qorynyń janyndaǵy ÁESI-diń oqýlyqtardy saraptaýǵa arnalǵan kezdesýde.
Onyń aıtýynsha, keń kólemdi aýdarma jumysy qazaq tilin halyqaralyq ǵylymı leksıkamen baıyta túsýge, ǵylymı termınologııany damytýǵa, akademııalyq jazý stılin jetildirýge, qazirgi ǵylymı-zertteý jáne baıandaý ádisterin meńgerýge zor múmkindik beredi. Bul jobany iske asyrý birqatar asa mańyzdy jáne atap óterlik júıeli máselelerdi sheshýge jol ashady.
«Birinshiden, gýmanıtarlyq baǵyt boıynsha álemniń 100 oqýlyǵy qazaq tiline aýdarylady. Sol arqyly tildiń damýyna asa qajetti ǵylymı mazmun jáne leksıka damıdy. Ekinshiden, gýmanıtarlyq sala boıynsha oqıtyn stýdentterdiń zaman talabyna saı bilim alýyna jaǵdaı jasalady. Bizdiń oqý oryndaryndaǵy mazmun jáne akademııalyq talqy deńgeıi álemniń ilgeri ǵylymı ortalyqtarynyń deńgeıine shyǵady», - deıdi ol.
Álibek Qısybaı aıtyp ótkendeı, úshinshiden, asa aýqymdy aýdarma jumysy Qazaqstandaǵy aýdarma mektebiniń kúsheıip, jetilýine jaǵdaı jasaıdy.
«Ózderińiz biletindeı, osyǵan deıin Qazaqstannyń aýdarma mektebi kóbine ádebı aýdarmaǵa negizdelgen bolatyn. Bul joba arqyly biz ǵylymı aýdarmanyń tikeleı qazaq tili arqyly aýdarylýyna jol ashamyz. Bul aýdarmashy mamandar, ǵalymdar men oqytýshylardyń jańa negizde jumys isteýine alǵyshart bolady. Bul tek aýdarý protsesi ǵana emes, sonymen qatar gýmanıtarlyq sala mamandaryn kitapty talqylaýǵa tartýǵa, sheteldik áriptestermen jumys isteýge múmkindik beredi», - deıdi Álibek Qısybaı.
Ol sonymen birge, Ulttyq aýdarma bıýrosy zaman talabyn da eskerip otyrǵanyn aıtty.
«Tórtinshiden, «Tsıfrly Qazaqstan» jobasyna sáıkes jáne álemdegi bilim berýde onlaın oqý kýrstarynyń qarqyndy damyp kele jatqandyǵyn eskere otyryp, aýdarylǵan oqýlyqtar negizinde mýltımedııalyq-ınteraktıv lektsııalar toptamasyn daıyndaý qarastyrylǵan. Onlaın-oqytý kýrstary vırtýaldy negizde jumys isteıtin «Qazaqstannyń ashyq ýnıversıteti» arqyly erkin taratylyp, ásirese aımaqtyq oqý oryndarynyń stýdentteri men oqytýshylar úshin erekshe paıdaly bolmaq. Osy múmkindikti paıdalana otyryp, Qazaqstannyń ǵalymdaryn, zertteý ortalyqtaryn, sala mamandary men jobaǵa qyzyǵatyn barsha jurtshylyqty ortaq iske atsalysýǵa shaqyramyz», - dep túıdi Álibek Qısybaı.
Aıta ketý kerek, Elbasynyń «Rýhanı jańǵyrý» baǵdarlamasy aıasyndaǵy «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha qazaq tiline 18 kitap aýdarylǵan bolatyn.
