Ulttyq atom kompanııasyna qajetti qurylǵylardyń deni OQO-da shyǵarylady

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev búgin «Qazatomprom» UAK» AQ basqarma tóraǵasy Ǵalymjan Pirmatovpen kezdesti. Onyń barysynda ekijaqty áriptestikke qatysty birneshe másele talqylandy, dep habarlaıdy QazAqparat HAA tilshisi.    

Aımaq basshysy ýran óndiretin kásiporynnyń oblys úshin asa mańyzdy ekenin atap ótip, kompanııa ókilderin kásibı merekeleri - Atom óndirisi qyzmetkerleriniń kúnimen quttyqtady.

«Qazatomprom» kompanııasy oblysymyzdyń áleýmettik-ekonomıkalyq damýyna edáýir úles qosýda. Óndiriste sońǵy úlgidegi jańa tehnologııalar qoldanylýda. Kásiporynǵa qajet qurylǵylardyń kóbisi bizdiń oblysta shyǵarylady. Biz ulttyq kompanııamen áriptestigimizdi odan ári jalǵastyramyz», - dedi Janseıit Túımebaev.

Óz kezeginde Ǵalymjan Pirmatov kompanııaǵa kórsetilip otyrǵan jan-jaqty qoldaý úshin óńir basshysyna alǵys bildirdi.

«Qazatomprom» oblysymyzdyń áleýmettik-ekonomıkalyq damýyna belsendi úles qosýyn jáne áriptestik baılanysty ári qaraı damytýdy jalǵastyra beredi. Ulttyq kompanııa óńirimizdiń jalpy óniminiń 13 paıyzǵa jýyǵyn óndiredi. Búgingi tańda jergilikti taýar óndirýshilerge qoldaý kórsetý úshin óńirimizdegi taýar jetkizýshilermen kelisimsharttar jasalǵan», - dedi Ǵalymjan Pirmatov.

Aıta ketý kerek, «Qazatomprom» UAK» AQ - Qazaqstannyń ýran eksporttaý men ony qosý, atom elektr stantsııalaryna qajet ıadrolyq otyn, arnaıy qurylǵylar men materıaldar, tehnologııany damytý boıynsha ulttyq operatory. «Qazatomprom» álemdegi ýran óndiretin jetekshi kompanııalardyń biri sanalady jáne Qazaqstan Respýblıkasyndaǵy balamaly energetıkany damytý baǵdarlamasynyń qatysýshysy bolyp tabylady.