Ulttyq atlastyń 3D úlgisi shyǵarylmaq
ASTANA. 13 jeltoqsan. QazAqparat - Aldaǵy ýaqytta biz Qazaqstannyń ulttyq atlasynyń 3D úlgisin shyǵarýdy josparlap otyrmyz. Bul týraly búgin Aqordada ótken saltanatty jıynnan keıin «Qazteńizgeofızıka» kompanııasynyń keńesshisi Mırǵalı Qonaev málim etti.
«Kartalardyń negizinde kóp nárse jatyr ǵoı. Odan biraz maǵlumat alýǵa bolady. Sodan bolar, biz jasap shyǵarǵan Qazaqstannyń ulttyq atlasyna qatysty júzdegen pikirler kelip tústi. Onyń ishinde sheteldik ǵalymdardyń lebizderi de bar. Bul atlasta Qazaqstan týraly tolyqqandy aqparat qamtylǵan. Aldaǵy ýaqytta biz ony tereńdetip, 3D úlgisin shyǵarýdy kózdeımiz», - deıdi M.Qonaev.
Aıta keteıik, búgin QR Prezıdenti N.Nazarbaev birqatar azamattarǵa ǵylym men tehnıka salasyndaǵy Memlekettik syılyqty tabystady. Olardyń ishinde «Parasat» ulttyq ǵylymı-tehnologııalyq holdıngine qarasty geografııa ınstıtýtynyń ujymy da bar. Olar - dırektor Ahmetqal Medeý, professor Farıda Aqııanova, zerthana jetekshisi Vıktor Blagoveşenskıı, bas menedjer Igor Malkovskıı men bas ǵylymı qyzmetker Emıl Nurmambetov. Sondaı-aq Abaı atyndaǵy Qazaq ulttyq pedagogıkalyq ýnıversıteti Geografııa jáne ekologııa ǵylymı-ádistemelik ortalyǵynyń basshysy Álııa Beısenova men «Qazteńizgeofızıka» kompanııasynyń keńesshisi Mırǵalı Qonaev Prezıdenttiń qolynan syılyq aldy. Olar elimizdiń ulttyq atlasyn jasap shyqty.
