Ulttyq arnada otandyq 14 jańa telehıkaıa kórsetiledi
NUR-SULTAN. QazAqparat – QAZAQSTAN arnasy jańa maýsymda jalpy sany 219 bólim bolatyn 14 jańa telehıkaıa kórsetedi, dep habarlaıdy QazAqparat tilshisi.
Bul týraly Qazmedıa ortalyǵynda Ulttyq arnanyń 61-shi maýsymynyń ashylýynda aıtyldy.
Jańa týyndylar qatarynda qazaq halqynyń Jońǵar shapqynshylyǵyna qarsy azattyq soǵysyndaǵy alǵashqy betburys - «Orbulaq shaıqasy», sahna syrtyndaǵy ómir kórinisin beıneleıtin «Jańǵyryq», taǵdyrdyń turmysyna moıymaǵan «Qanatsyz qustar», «Gaýhar», «47 balanyń anasy», shytyrmanǵa toly «Qashqyn», «Jolaıryq», taǵdyrdyń jazýymen ekige bólingen «Egiz ǵumyr», ózgeniń ómiri úshin arpalysqan «Ǵazız júrek», otbasy men mahabbat tańdaýǵa túsken «Áýlet ary» telehıkaıalary bar.
Sonymen birge, otansúıgishtikke úndeıtin, namysty shyńdaıtyn «Shekara», «Áskerden hat», eki túrli ult pen dúnıetanymdy bir shańyraqqa toǵystyrǵan «Qara jorǵa», úlken armanǵa asyqqan «Eldiń balasy» serıaldary bar.
Sonymen birge, tarıhtyń aqtańdaq betterin paraqtaıtyn «Beımálim Alash», «Bir pesa izimen», «Tulǵalar», kórikti jerlerdiń turmys-tirshiligimen tanystyratyn «Keń baıtaq qazaq eli», «Rýhanı jańǵyrý. Eki jyldyq asý» derekti fılmderi kórermenge jol tartady.
Buǵan deıin «Qazaqstan» RTRK» AQ Basqarma tóraǵasy Lázzat Tanysbaı ulttyq arnanyń 61-shi maýsymyn ashqan bolatyn.
Eske sala ketsek, kúzgi jańa maýsymda «Qazaqstan» Ulttyq arnasynan 14 jańa joba efırge shyǵady. Osyǵan deıin kórermen yqylasyna bólenip úlgergen 10 baǵdarlama jańasha formatta qaıta usynyldy.
