Ulttyq arnada «Qazaqstan Daýysy» jobasynyń «Kórmeı tyńdaý» kezeńi óz máresine jetti
ASTANA. 14 qarasha. QazAqparat - Ulttyq arnada «Qazaqstan Daýysy» jobasynyń irikteý kezeńi óz máresine jetti, dep habarlady «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
Birneshe apta boıy shyr kóbelek aınalǵan aınalmaly oryndyq ıeleri aqyry bir toqtamǵa kelip, ózderine tıesili 16 úmitkerdi tańdap aldy. Daryndy úmitkerlerdiń daýysyna tálimgerlerdiń ózi talasty. Keıbir úmitkerdiń baby kelisse de, baǵy janbady. Sahna tórinde bolyp jatqan kóńil tebirenter talaı jaıtqa qalyń kórermen kýá boldy. Ánniń alǵashqy notalarymen-aq tálimgerlerdiń betin beri qaratqan talanttardyń óneri erekshe boldy. Joba barysynda 4 tálimger úmitkerlermen birge jylap, birge qýandy. Olardyń da saf daýysty dóp basyp taba almaı, ókinip qalǵan tustary da boldy. Qalaı desek te «Kórmeı tyńdaý» kezeńiniń áserli sátteri artta qaldy.
Alda «Shaıqas» kútip tur. Іrikteýden súrinbeı ótip, tálimgerlerdiń qamqorlyǵyna ilingen ónerpazdar endi ózara shaıqasady.
Tálimgerler tańdap alǵan 16 úmitker óziniń myqty ekenin dáleldeý úshin bir birimen básekege túsedi. 2 úmitkerge bir án beriledi. Ándi naqyshyna keltire shyrqap, mysy basym túsken júırik qana kelesi kezeńge ótedi. Al qarsylasyna tótep bere almaǵan ónerpaz jobadan shyǵyp qalady.
Mine osy aptada jobanyń naǵyz sharyqtaý shegi «Shaıqas» kezeńi bastalady. Úmitkerlerdiń shabytyn shyńdap, talantyna qamshy basar tusy endi kelgen sekildi. Bul joly da tálimgerlerge ońaı soqpasy anyq. Olar kóptiń ishinen tańdap alǵan úmitkerlerin óz sheshimimen jobadan shyǵaryp jiberedi. Demek, ónerpazdardyń osy jobadaǵy taǵdyry tálimgerdiń qolynda.
«Shaıqas» kezeńi, rasynda «Qazaqstan daýysy» atanǵysy kelgender úshin naǵyz shaıqas bolmaqshy. «Qazaqstan daýysynyń» kezekti kórsetilimin 17 qarasha kúni saǵat 21.30-da tamashalaýǵa bolady.
