Ulttyq arna kórermenine «Kelinin» qaıtaryp berdi (FOTO)
ASTANA. QazAqparat - «Qazaqstan» Ulttyq telearnasy kórermenderdiń júregin jaýlap alǵan «Kelin» serıalynyń jańa maýsymyn ashpaq. Endi «Kelin» teleserıalyn «Qazaqstan» telearnasynyń efırinde 21 qyrkúıekten bastap, dúısenbi-juma aralyǵynda 22:00-de tamashalańyzdar, dep habarlady «Qazaqstan» RTRK AQ baspasóz qyzmetinen.
Ulttyq arnanyń baspasóz qyzmeti úndi serıalyn qaıtadan efırge shyǵarýdyń sebebin túsindirdi.
«Elimizdiń túpkir-túpkirinde, alys aýyldardan bastap, úlken qalalarda turatyn kóptegen jankúıerler «Qazaqstan» telearnasynyń redaktsııasyna jáne áleýmettik jelilerde (VKontakte, Facebook, Twitter, Instagram) hattar joldap, efırde «Kelin» serıalynyń jalǵasyn qoıýdy ótine suraýda. Bul hattardan aǵa býyn ókilderinen bastap, jastarymyzǵa deıin atalǵan jobaǵa degen mahabbattyn kórýge bolady», delingen telearnanyń baspasóz qyzmeti taratqan habarlamada. Mysaly, úzindiler keltire ketsek, Astana qalasynyń turǵyndary Júsipovter, Amangeldıevter jáne Beısembekterdiń otbasylary bylaı dep jazady, «...Bul serıal bizdi jarqyn boıaýlarymen, ádemi bet-beınelerimen baýrap qana qoımaı, sol sııaqty keıipkerlerdiń bir-birine degen qarym-qatynasy, úlkenderge degen qurmeti, qazaq dástúrine óte uqsas bolǵandyqtan tánti etti. Bul serıalda bári derlik durys: ene men kelin, sheshe men qyzdyń, áje men nemereniń, aǵaıyndardyń arasyndaǵy qarym-qatynastardyń óte oryndy ekenin jetkizgimiz keledi!...Biz serıaldyń keıipkerlerin jaqsy kórip qaldyq. «Qazaqstan» arnasy «Kelin» serıalynyń kórsetilimin toqtatqanda túńilip qaldyq». Qyzylorda oblysynan Almagúl Myrzabek óziniń hatynda bylaı deıdi: «...Bizdiń aýylda barlyǵy derlik «Kelin» serıalyn kóredi. Nege atalǵan serıaldy qaıtadan efırge bermeske? Menińshe, Úndiniń mádenıeti, otbasylyq qaǵıdalary bizdiń mentalıtetke óte uqsas. ...Biz olardyń tilin, dinin almaımyz ǵoı, úlkenge degen qurmetin, kóregendiligin alamyz. Sondyqtan, serıal jalǵasyn tapsa eken. Biz Sizderdiń kórermen oıyn qatty baǵalap, ótinishimizdi jerde qaldyrmaıtyndaryńyzǵa senemiz...». «Qazaqstan» telearnasy óz kórermenderiniń osy syndy suraýlaryn eskere otyryp, jańa maýsymda serıaldyń kórsetilimin jalǵastyrmaq.
