Ulttyq arna halyq ánderi men kompozıtorlarynyń shyǵarmalaryn dáriptemek

NUR-SULTAN. QazAqparat - «Qazaqstan» Ulttyq telearnasynda 26 shildeden bastap dástúrli mýzyka men onyń tarıhynan syr shertetin «Kúmis kómeı» ulttyq mýzykalyq tanymdyq baǵdarlamasy efırge shyǵady.

Bul týraly «Qazaqstan» RTRK» AQ baspasóz qyzmeti málim etti. Ulttyq mýzykany dáripteý maqsatynda qolǵa alynǵan jobaǵa S. Janpeıisova, T. Nurkenov, E. Shúkiman, M. Myqtybaev, E. Qosbarmaqov, A. Noǵaıbaeva, E. Rysqalı, T. Kenenqyzy, O. Qulsymaq, A. Óteshov, G. Sarına, P. Turarova, B. Bábijan syndy elge tanymal ónerpazdar qatysady.

Qatysýshylar dombyra, qobyz, sybyzǵy, sazsyrnaı, syrnaı, jetigen, t.b. aspaptardyń súıemeldeýimen halyq ánderi men kúı-termeler oryndap, karantındegi shekteýlerge baılanysty ulttyq ónerden qol úzip qalǵan talǵampaz kórermendi ásem áýendermen sýsyndatady.

Sondaı-aq telebaǵdarlamada ulttyq mýzykanyń bastaýynda turǵan halyq kompozıtorlary shyǵarmashylyǵy men halyq ánderi, dástúrli mýzyka mektepteriniń tarıhy týraly aıtylady.

Baǵdarlama júrgizýshisi - QR Eńbek sińirgen qaıratkeri, dástúrli ánshi Aıgúl Qosanova. Joba «Qazaqstan» Ulttyq telearnasynan ár jeksenbi 20:00-de efırge shyǵady.