Ulttyq ál-aýqat qorynyń tıimdiligin korporatıvtik basqarý tetikteriniń kómegimen monıtorıngileý júıesi kózdeledi
ASTANA. 11 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine «Ulttyq ál-aýqat qory» qyzmetiniń máseleleri boıynsha ózgerister men tolyqtyrýlar engizý týraly» zań jobasyn eki oqylymda qarap, qabyldady.
Atalǵan zań jobasy Senat qabyldaǵan «Ulttyq ál-aýqat qory týraly» zańda kózdelgen normalardy júzege asyrý maqsatynda ázirlengen. Bul rette zań jobasymen Qylmystyq, Bıýdjet kodeksterine jáne «Sybaılas jemqorlyqqa qarsy kúres týraly», «Aktsıonerlik qoǵamdar týraly», «Memlekettik múlik týraly» zańdaryna ózgerister engiziledi.
Atap aıtqanda, qujat boıynsha sybaılas jemqorlyqqa qarsy zańnamanyń normalary qoldanylatyn adamdar tobyn neǵurlym naqty retteýge baǵyttalady. Osyǵan baılanysty «Ulttyq ál-aýqat qoryna» jáne onyń tobyna kiretin uıymdarǵa qatysty sybaılas jemqorlyq quqyqbuzýshylyqtardyń sýbektilerin aıqyndaý maqsatynda basqarý fýnktsııalaryn atqaratyn adamdarǵa qatysty uǵymdar naqtylanatyn bolady. Bıýdjet kodeksine «Ulttyq ál-aýqat qory» tobyna kiretin uıymdarǵa memlekettik tapsyrma tetigin qoldanýdy belgileıtin norma qamtylady.
Sonymen qatar, Qor qyzmetine qatysty onyń tıimdiligin korporatıvtik basqarý tetikteriniń kómegimen monıtorıngileý júıesi kózdeledi. Budan bólek, Qordyń barlyq kompanııalarynyń qyzmet nátıjelerin jyl saıynǵy negizde tyńdaý jóninde Qor Basqarmasynyń quzyreti kózdeledi. Al Ál-aýqat qory tobynyń uıymdary úshin satyp alý qaǵıdalaryn Qordyń dırektorlar keńesi bekitetin bolady.
