Ulttyq akkredıtteý ortalyǵy otandyq ónimdi shetelde ilgeriletýge septigin tıgizedi
ASTANA. QazAqparat - Qazaqstannyń Ulttyq akkredıtteý ortalyǵy otandyq ónimdi shetelde ilgeriletýge septigin tıgizedi. Mundaı pikirdi búgin QR Investıtsııalar jáne damý mınıstrliginde ótken brıfıngte atalǵan ortalyqtyń bas dırektory Maqsut Ómirhanov bildirdi, dep habarlaıdy QazAqparat.
«Búgingi kúni Ulttyq akkredıtteý ortalyǵynda 1445 sýbekti akkredıttelgen. Onyń ishinde 89 ónimder men kórsetiletin qyzmetterdiń sáıkestigin rastaý organy, 73 menedjment júıesi boıynsha sáıkestitigin rastaý organy, 800 synaq zerthanasy, 401 salystyryp tekserý zerthanasy, 50 kalıbrleý zerthanasy bar. Esterińizde bolsa 2003 jyly Qazaqstan kásipkerleriniń 11-shi forýmynda Elbasy shetelde qazaqstandyq sertıfıkattardy taný týraly máseleni kótergen edi. Osyǵan baılanysty halyqaralyq naryqta qazaqstandyq bıznesti qoldaý jáne qorǵaýdyń tıimdi tetigin ázirleýge, shetelde qazaqstandyq sertıfıkatty taný boıynsha jumys jumys júrgizýge tapsyrma berilgen bolatyn», - dedi Maqsut Ómirhanov.
Onyń aıtýynsha, Qazaqstan Prezıdentiniń tapsyrasyn iske asyrý úshin akkredıtteý jónindegi halyqaralyq uıymdarǵa múshe bolý qajet boldy. Nátıjesinde Ulttyq akkredıtteý ortalyǵy 2007 jyly ILAC uıymyna tolyq quqyly múshelikke ótken. Al 2010 jyly ILAC MRA qazaqstandyq ortalyqtyń qol qoıýshysy bolyp bekidi. Munan keıingi jyldary PAC tolyq quqyly qol qoıýshy, PAC MLA kelisimniń qol qoıýshysy, IAF tolyq quqyly múshesi jáne IAF MLA kelisim qol qoıýshysy boldy.
«Akkredıtteý jónindegi halyqaralyq uıymǵa múshe bolý saýdadaǵy tehnıkalyq kedergilerdi alyp tastaý, shetelde otandyq ónimdi ilgeriletý, sáıkestikti baǵalaý jónindegi rásimder júrgizý kezinde qosymsha shyǵystardy tómendetý maqsatynda jasaldy. Uzaq ýaqyt boıy ter tógilgen bul jumystardyń nátıjesinde ILAC MRA belgisimen synaq hattamasy jáne IAF MLA belgisimen sáıkestik sertıfıkaty alyndy», - dedi ol.
Bas dırektordyń aıtýynsha, búginde Ulttyq akkredıtteý ortalyǵymen 198 zerthana shart jasasqan jáne olar ILAC MRA zerthanalyq biriktirilgen belgisin paıdalanýǵa quqyq alyp otyr. Atalǵan zerthanalar Qazaqstannyń zańdy tulǵalaryna 570 114 synaq hattamalaryn, onyń 10492-sin Qazaqstan aýmaǵynan tysqary jerde bergen.
«Synaq hattamalary balyq jáne balyq ónimderine, et jáne et ónimderine, shujyq ónimderine, sút jáne sút ónimderine, ara balyna, bıdaı ónimderine, júgeri, unǵa, kúnbaǵys, soıa, raps jomyna, qoı júnine, iri qara mal terisine, sonymen qatar tabıǵı jáne mıneraldy emdik-ashana sýlaryna berildi. Ónimder Qyrǵyzstan, Tájikstan, Ózbekstan, Aýǵanstan, Qytaı, Japonııa, Iran, Serbııa, Ispanııa, Reseı, Belarýs, Ázerbaıjan, Grýzııa, Polshaǵa eksporttalady», - dedi ol.
Onyń dereginshe, IAF MLA biriktirilgen belgisin paıdalaný 53 uıymǵa ruqsat etilgen. Jalpy IAF MLA biriktirilgen belgisimen 10335 sáıkestendirý sertıfıkaty berilgen.
