Ulttyq akademııalyq kitaphanada Tursynbek Kákishevtiń jeke kitaphanasy «Ǵalym» zaly ashyldy

«Osy ashylyp otyrǵan úlken oqý zalyna Tursynbek Kákishevtiń aty berilip otyr. Ǵalymnyń bul zalyna kelip, bilimmen sýsyndaıtyn, ǵylymǵa ózin qalyptastyratyn bolashaq qazaqtyń urpaǵy talaı qajetti dúnıesin tabatyn bolady», - dedi Parlament Senatynyń depýtaty, Qazaqstan Jazýshylar odaǵynyń tóraǵasy Nurlan Orazalın.

2015 jyly ómirden ótken ǵalymnyń jeke kitaphanasynda gýmanıtarlyq ǵylymdar boıynsha bes myńǵa jýyq kitap, sondaı-aq belgili jazýshylar Sáken Seıfýllın, Sábıt Muqanovtardyń ómiri men qyzmetine qatysty qundy muraǵattyq qujattar bar. Ǵalymnyń qoljazbalary, muraǵattyq qujattary men basqa da materıaldarynan quralǵan 83 papka qujat kitaphanaǵa syıǵa berildi.

Tursynbek Kákishevtiń jeke kitaphanasyn ǵalymnyń jubaıy, fılologııa ǵylymdarynyń doktory, professor Kúlásh Sadyqqyzy Ahmet QR Ulttyq akademııalyq kitaphanasynyń qoryna tartý etti.

Óz kezeginde QR Mádenıet jáne sport mınıstri Arystanbek Muhamedıuly ǵalymnyń jınaǵan ǵylymı mol qazynasyn kitaphanaǵa tartý etkeni úshin alǵysyn aıtty.

«Ǵalymnyń óziniń jeke qoljazbalary, izdenip tapqan qundy materıaldary qamtylǵan. Bunyń barlyǵy aldaǵy ýaqytta zertteýdi qajet etetin shyǵarmalar», - dedi mınıstr.

Aıta keteıik, zaldyń ashylýy aıasynda «Maǵjan-Sáken» kitabynyń tusaýy kesildi.

Kákishev kitaphanasyn óte úlken ári qory baı jeke kitaphanalardyń biri dep  ataýǵa bolady. Kitaphanadan ıesiniń óziniń iri tulǵa ekendigi - onyń entsıklopedızmi, keń oı-órisi, ynta-jigeri, tereń bilimdiligi kórinedi. Syıǵa tartylǵan týyndylar qatarynda arab tilindegi sırek basylymdar jáne latyn álipbıindegi qazaq balalar ádebıeti, kórkem ádebıetter, ádebıettaný, tarıh, arhıtektýra, óner, entsıklopedııalar toptamalary, anyqtamalyqtar, otandyq jýrnaldar, antıkalyq avtorlardyń kitaptary da kóptep tabylady, sondaı-aq qyrǵyz, qytaı jáne túrik tilderindegi týyndylar da kezdesedi.   

Tursynbek Kákishevtiń kitaphanasy jańa «Ǵalym» zalynda ornalasqan. Jańa zal aqparattyq, mádenı jáne bilim berý mindetterin atqarady. Negizgi mindeti - paıdalanýshylarǵa, sol qatarda zertteýshilerge, magıstranttarǵa, ǵalymdarǵa aqparattyq-bıblıografııalyq qyzmet kórsetý, mádenı-kópshilik is-sharalar ótkizý.