Ulttyq akademııalyq kitaphanada «Shańyraq» balalar oqý zaly ashyldy
ASTANA. QazAqparat - Búgin Astanadaǵy Ulttyq akademııalyq kitaphana óz oqyrmandaryna «Búgingi bala - bilimdi bala» atty kitap meıramynyń baǵdarlamasyn usyndy.
Osy shara aıasynda arnaıy jabdyqtalǵan «Shańyraq» balalar oqý zaly ashyldy.
Ulttyq akademııalyq kitaphananyń Bas dırektory Úmithan Muńalbaeva bilim kúni balalarǵa arnaıy syılyq retinde osyndaı turaqty jumys isteıtin zaldyń ashylyp otyrǵanyn jetkizdi. Baldyrǵandar munda kelip, kitap oqýyna, sýret salýyna jáne basqa da shyǵarmashylyq jumystarmen tanysýyna bolady.
Kitaphanaǵa jınalǵan jas oqyrmandarǵa zeınetker, ardager ustaz Qajek Esenbekuly bata berdi. Táýelsiz elimizdiń bolashaǵy bilim men ǵylym jolyn qýǵan balalar ekenin tilge tıek etti.
Aqyn Nesipbek Aıtuly balalarǵa arnalǵan mundaı zaldyń ashylýy jaqsy bastama ekenin, elimizdiń basqa kitaphanalarynda da osyndaı ortalyqtar bolǵany durys ekenin aıtty.
Balalar jazýshysy Tolymbek Ábdiraıym kitap oqıtyn zerdeli balalar bilimdi de aqyldy bolatynyn aıtty jáne mundaı zalda jas oqyrmannyń zerek bolyp ósýine barlyq múmkindik bar ekenin jetkizdi.
Aqyndar Aıbatyr Seıtaq pen Qalqaman Sarın «Shańyraq» balalar oqý zalyna jyr jınaqtaryn tabys etti.
Osy sharaǵa kelgen baldyrǵandar án aıtty, taqpaq oqydy jáne kitaphanaǵa jıi kelip turýǵa ýáde berdi.
