Ulttyq akademııalyq kitaphanada «Bul Jeńis kúni» atty kesh ótedi
Ádebı-mýzykalyq keshke Uly Otan soǵysynyń ardagerler keńesiniń ardagerleri Qurmantaı Aıtjanov, Sıhymbaı Mamyrov jáne tyl ardagerleri Qaıdar Meńdiqulov, Insafıdın Gareev jáne kitaphana oqyrmandary men oqýshylar qatysady.
Sharanyń maqsaty - el basyna kún týǵan sátte týǵan jerdiń namysy úshin maıdanǵa attanyp, Otan úshin janqııarlyq erlik kórsetken jaýjúrek qaharmandarymyzdyń erlikterin máńgilik urpaq jadyna sińirý. Ardagerlerdiń týǵan elimizdiń azattyǵy jolyndaǵy jasaǵan erlik isterin jalǵastyrý, urpaqtan urpaqqa jetkizý.
Sondaı-aq keshte Uly Jeńis kúni týraly beınefılm kórsetilip, óleń-jyr oqylady. Keshke arnalyp kitaphana qorynan «Erlik - elge mura» taqyrybynda kitap kórmesi uıymdastyrylady.
1941-1945 jyldar aralyǵyndaǵy Uly Otan soǵysyna 35 mln adam, sonyń ishinde 1,5 mln qazaqstandyq qatysty. Bul respýblıka halqynyń 18 ben 50 jas aralyǵyndaǵy eresekteriniń 70 paıyzy. Soǵystyń alǵy shebinde Qazaqstannan jiberilgen 23 birlestik, 50 shaqty polktar men batalondar shaıqasty. Qazaqstandyqtar Máskeý men Lenıngradty janyn qııa qorǵap, Ýkraına men Belarýsti, Baltyq mańy men Moldovany azat etýge atsalysty, Berlın shabýylyna qatysty. Ondaǵan myń qazaqstandyq eren eńbegi men erlikteri úshin marapattalsa, bes júzden astam adam Keńes Odaǵynyń batyry atandy. Tórt adam bul ataqqa eki márte ıe boldy, 142 adam Dańq ordeniniń tolyq jınaǵynyń ıegeri atandy.
Bul kúni biz qaısarlyqtyń, qaıtpas rýh pen jalyndy jigerdiń has úlgisin kórsetken barsha soǵys jáne tyl ardagerleriniń aldynda taǵzym etemiz. Bul mereke haqylymyzdyń máńgilik maqtanyshy bolyp qala bermek.
Keshtiń bastalýy búgin saǵat 15-00-ge josparlanǵan.
