Ultty uıystyrǵan uly kún: elordalyqtardyń toıynan úzik sátter (FOTO, VIDEO)
Atap aıtqanda, «Otan qorǵaýshylar» monýmentiniń aldyndaǵy alańǵa ejelgi salt-dástúrimizge saı kıiz úıler tigildi. Astana qalasy Almaty aýdanynyń ákimdigi oqýshylar men JOO, kolledj stýentteriniń qatysýymen kontsert uıymdastyrdy. L.N.Gýmılev atyndaǵy EUÝ, «Astana Telekom» AQ, №1 Avtobýs parki, «Nur Otan» partııasynyń Astana qalalyq fılıaly, «BI Group», «Bahýs», «Nur Bereke 555», «Meıir-M» jáne «BIG-Shanhaı» JShS-teri óz kıiz úılerin quryp, ózderinshe dastarqan jaıdy.
Joǵaryda atalǵan uıymdar Naýryz meıramynyń aldynda turmysy nashar, kóp balaly otbasylarǵa qurt, jent, qymyz taǵy basqa ulttyq taǵamdar toltyrylǵan dorbalar syılap, kópshiliktiń alǵysyna bólendi. Sonymen qatar, ákimdiktiń aldyndaǵy alańda da keń aýqymdy is-shara ótýde. Adamdardyń kóńil kúıleri kóterińki, olarǵa arnap túrli oıyn-saýyqtar uıymdastyryldy. Astanalyqtardyń basym bóligi arqan tartý, qyz qýý, asyq atý syndy ulttyq oıyndarǵa qýana qatysyp jatyr. Balalar altybaqan teýip, atqa minip máz-meıram. Oǵan qosa, qazaq halqynyń ádet-ǵuryptary da kórsetildi.
Kongress-holldyń aldynda Saryarqa aýdanynyń ákimdigi «EKSPO-2017» AQ-men birlesip kıiz úı aýylyn qurypty. Aýlasynda qazaqsha kúres pen toǵyz qumalaqtan jarystar ótti. Odan keıin «Jastar» teatrynyń, «Shattyq», «Arýlar», «Assa», «My Way» atty bı ujymdarynyń, Qorǵanys mınıstrliginiń ónerpazdary men ózge de ártisterdiń qatysýymen kontsert berildi.
En-tegin daıyndalǵan naýryz-kóje barlyq qonaqtarǵa taratyldy. Aqsaqaldar da aq batasyn aıamady.
Budan basqa, «Meniń otbasym» atty ınternet fotobaıqaýdyń jeńimpazdaryn marapattaý rásimi ótti. Birinshi oryndy Jámılá Baıbosynova (syıaqysy 70 myń teńge), ekinshi oryndy Knıgına Vıktorııa (50 myń teńge) jáne úshinshi oryndy Natalıa Kozlova (30 myń teńge) ıelendi. Kesheden beri kúnniń kózi de erekshe shýaǵyn shashyp, bir aptadan beri soqqan Saryarqanyń jeli sap tyıylyp, meıramdatyp júrgen halyqtyń kóńil kúıin odan saıyn kóterýde.
