Ulttyq jobalar men ekonomıkalyq damý: Astanada Kursiv Infrastructure Forum ótedi

ASTANA. KAZINFORM — 2025 jyldyń 23 qyrkúıeginde Astanada Qazaqstannyń ekonomıkalyq damýyna ulttyq jobalardyń áserin talqylaıtyn aýqymdy shara ótedi.

Ulttyq jobalardy Qazaqstan ekonomıkasynyń basty qozǵaýshy kúshi dep ataýǵa tolyq negiz bar. Memleket logıstıkaǵa, kólik ınfraqurylymyna, áleýmettik bastamalarǵa mıllıardtaǵan qarjy quıyp otyr. Bul baǵytta ondaǵan joba júzege asyryldy, jınaqtalǵan tájirıbe de az emes. Árıne, tabystarmen birge sheshýdi qajet etetin túıtkilder de bar. Sondyqtan qaı nátıjege qol jetkizgenimizdi baǵamdap, áli de jetildirý úshin qandaı ózgerister qajet ekenin túsinip, búgingi jetistikterdi uzaq merzimdi damý tiregine aınaldyrý joldaryn aıqyndaý asa mańyzdy. Ol úshin jan-jaqty taldaý men ashyq pikir almasý qajet.

— El ekonomıkasynyń aýqymyna qarasaq, salynǵan árbir jańa jol, qaıta jóndelgen vokzal ne mektep — jaı ǵana qurylys nysany emes, ishki naryqty keńeıtýdiń mańyzdy quraly. Mysaly, kólik baılanysy jaqsarsa, Almatydan Petropavlǵa taýardy jetkizý birneshe saǵattyq sharýaǵa aınalady, al Shymkenttiń fermeri Astananyń iri naryǵyna tikeleı shyǵa alady. Bul bıznestiń tranzaktsııalyq shyǵyndaryn azaıtyp, logıstıkany «tusaýdan» bosatyp, kerisinshe básekege qabilettiliktiń sheshýshi faktoryna aınaldyrady. Osyndaı mysaldy memleket júzege asyryp jatqan kez kelgen iri jobaǵa qatysty aıtýǵa bolady. Óıtkeni mundaı bastamalar — shyǵyn emes, uzaqmerzimdi ekonomıkalyq ósim men adamı kapıtaldy damytýǵa salynǵan ınvestıtsııa. Degenmen ulttyq jobalardyń tym aýqymdy bolýy belgili bir qıyndyqtardy da týyndatatyny jasyryn emes. Keıde olardyń saldarynan tutas óńirler nemese jekelegen salalardyń arasynda alshaqtyq paıda bolýy múmkin. Osyndaı jaǵdaıda basqarýdyń sapasy sheshýshi ról atqarady. Túptiń túbinde árbir ınfraqurylymdyq bastama el damýyna sınergııa qosyp, ózgeristerdiń biryńǵaı júıesine enýi qajet. Tek osyndaı kózqaras qana aýqymdy jobalardy jahandyq naryqtaǵy shynaıy básekege qabilettiliktiń quralyna aınaldyra alady, — dep atap ótti Kursiv Media bas dırektory Anastasııa Novıkova.

Forým aıasynda úsh sessııa ótedi. Árqaısysynda qatysýshylar memlekettik ınfraqurylymdyq jobalardyń nátıjelerin kópshilikke usynyp, kólik pen energetıka salasyndaǵy iri bastamalardyń aýqymy men olardyń ulttyq ekonomıkaǵa tıgizer yqpalyn talqylaıdy.

«Infraqurylymdyq jobalar QR ekonomıkalyq damýynyń qazirgi modeliniń «toǵysý núktesi» retinde» atty plenarlyq sessııada sarapshylar ınfraqurylymdyq jobalardyń el ekonomıkasyn damytýdaǵy róline toqtalady. Sonymen qatar áleýmettik ınfraqurylymnyń ulttyq adamı kapıtaldy arttyrý mindetterine sáıkestigi, al kólik-logıstıka keshenine salynǵan ınvestıtsııalardyń el ishindegi baılanysty kúsheıtip, eksport áleýetin keńeıtýge qosqan úlesi taldanady.

«Jaıly mektep» ulttyq pılottyq jobasy — memlekettik ınstıtýttardyń beriktigin synaıtyn tájirıbe alańy» dep atalatyn birinshi paneldik sessııada jobanyń qurylys salasyna tıgizgen áseri sóz bolady. Qatysýshylar ulttyq joba aıasynan tys jatqan qurylys naryǵynyń bolashaǵyn da qozǵaıdy.

«Ekonomıkalyq damý ınfraqurylymy: tanys baǵdarlar, jańa múmkindikter» atty ekinshi paneldik sessııa logıstıka men ınfraqurylym máselelerine arnalady. Onda kólik jáne energetıka ınfraqurylymynyń qurylysy kezinde otandyq óndirýshilerdiń múddesi qanshalyq eskerilgen jáne salynǵan nysandardyń qanshalyqty tıimdi paıdalanylyp jatqany talqylanbaq.

Іs-shara 23 qyrkúıek saǵat 12:00-den 18:30-ǵa deıin Rixos President Astana qonaq úıinde ótedi. Qatysý tegin. Tirkelý úshin siltemege ótý qajet. 

Budan buryn Astanada 15 eldiń konstıtýtsııalyq soty qatysqan halyqaralyq forým uıymdastyrylǵanyn jazǵan edik.