Ulttyq joba: Óńirlerde alǵashqy jobalar iske qosyldy
ASTANA. KAZINFORM – Vıtse-premer Qanat Bozymbaev Energetıka jáne kommýnaldyq sektorlardy jańǵyrtý jónindegi Ulttyq jobasy aıasynda atqarylyp jatqan jumystardyń barysyn tekserdi. Ol pılottyq jobalardy qarjylandyrý, satyp alý tetigi, otandyq óndirýshilerdi qoldaý jáne «Smart Turmys» biryńǵaı tsıfrlyq platformasyn qurý máseleleri boıynsha esepterdi tyńdady.
Qazirgi ýaqytta Ulttyq joba aıasynda 48 pılottyq joba bekitilgen. Bıyl «QTK» AQ jelisi boıynsha Qaraǵandy, Pavlodar, Batys Qazaqstan jáne Soltústik Qazaqstan oblystarynda 10 pılottyq jobany iske qosýǵa 22,5 mlrd teńge bólindi. Bul – «QTK» AQ tarapynan ákimdikterdiń oblıgatsııalaryn satyp alyp, jylý, sý, sý tazartý jáne elektrmen jabdyqtaý nysandaryn jańǵyrtýǵa baǵyttalǵan alǵashqy tájirıbe.
«QDB» AQ qaraýynda jalpy quny 118,4 mlrd teńgeni quraıtyn 8 joba bar. Memlekettik organdar otandyq taýar óndirýshiler men tabıǵı monopolııa sýbektileri arasynda ózara is-qımyldy uıymdastyrdy. Otandyq óndirýshilerdiń tizilimi jasaqtalyp jatyr. Óńirler boıynsha 669 EPC-merdiger jáne 2,2 trln teńgeniń 2,7 myń taýar pozıtsııasy aıqyndaldy.
Ofteık kelisimsharttar aıasynda óndiristi jolǵa qoıý úshin áleýetti taýarlar tizimi jasaldy. Taýarlarǵa degen suranys Ónerkásip jáne qurylys mınıstrliginiń jáne «QazIndustry» AQ-nyń resmı saıttarynda jarııalandy.
Elektrondyq satyp alý platformasy ázirlenýde. Sala qaýymdastyqtary men otandyq óndirýshilerge taýarlardy satyp alý tetigin túsindirý boıynsha kezdesý ótti. Ulttyq jobanyń negizgi baǵyttaryn túsindirý maqsatynda óńirlerde kóshpeli semınar-keńester jalǵasyp jatyr. Ulttyq jobanyń júzege asyrylý barysy modernization.kz saıtynda jáne «Modernızatsııa.Kz» Telegram-arnasynda jarııalanyp otyrady.
Jobalyq ofıs otyrysynda turǵyn úı-kommýnaldyq sharýashylyq salasyna tsıfrlandyrý, jabdyqtandyrý jáne jasandy ıntellekt engizý, sondaı-aq halyqaralyq tájirıbeni zerdeleý máselelerine erekshe nazar aýdaryldy.
Jıyndy qorytyndylaı kele, vıtse-premer Qanat Bozymbaev ákimdikter men salalyq mınıstrlikterge qoldanystaǵy barlyq protsesti jedel aıaqtaý jáne 2026–2029 jyldarǵa arnalǵan óńirlerdiń qajettilikterin aıqyndaý jóninde birqatar tapsyrma berdi.