Ulttyq jasandy ıntellekt platformasy qurylady

ASTANA. KAZINFORM – QR Parlamenti Májilisiniń depýtaty Únzıla Shapaq jaqynda qabyldanǵan Jasandy ıntellekt týraly zańnyń qalaı jumys istep jatqany týraly aıtyp berdi.

— Bul qujat elimiz úshin alǵashqy ári mańyzdy qadamnyń biri bolmaq. Zań aıasynda jasandy ıntellektige qatysty jańa quqyqtyq túsinikter engizilip, ulttyq jasandy ıntellekt platformasyn qurý kózdelgen. Sońǵy jyldary JI taqyryby álemdik deńgeıde qyzý talqylanyp keledi. Bul tehnologııalar bizdiń kúndelikti ómirimizge enip qana qoımaı, zań turǵysynan da jańa talaptardy qajet etip otyr. Qazaqstan da osy úrdisten shet qalǵan joq. Jasandy zeıin adamdy tolyqqandy almastyra almaıdy. Biraq túrli túıtkilderdiń sheshimin izdeýde taptyrmas qural. JI-di ázirlep engizý úshin aldymen Ulttyq platforma qurý kerek, - dedi ol Jibek Joly telearnasyndaǵy «Bugin Live» baǵdarlamasynda.

Depýtat bul turǵyda derekterdiń qaýipsizdigi birinshi orynda bolýy mańyzdy ekenin aıtty. Sondyqtan zańnamada atalǵan platformaǵa aýdıt jasaý múmkindigi de qarastyrylǵan.

— Jasandy Intellekt arqyly jasalǵan sıntetıkalyq kontentti mindetti túrde tańbalaý talaby bekitildi. Bul – azamattardyń aqparatqa degen senimin arttyrýǵa baǵyttalǵan shara. Buǵan qosa, adamnyń kelisiminsiz minez-qulqyna áser etý, emotsııasyn taldaý nemese áleýmettik mártebesine qaraı jikteý sııaqty birqatar fýnktsııalarǵa zań júzinde tyıym salyndy. Jańa zań bir jaǵynan ınnovatsııalyq damýǵa jol ashsa, ekinshi jaǵynan qoǵamnyń qaýipsizdigi men azamattardyń quqyǵyn qorǵaýdy kózdeıdi. Bul rette avtorlyq quqyq máseleleri de nazardan tys qalmaı, JI kómegimen jasalǵan shyǵarmashylyq ónimderge qatysty naqty normalar engizildi, - dedi Únzıla Shapaq.

Buǵan deıin, Májilis «Jasandy ıntellekt týraly» jáne oǵan ilespe zańdardy qabyldaǵanyn jazǵan edik.