«Ulttyq Wi-Fi operatory» - JI mınıstrligi Freedom Telecom jobasynyń ataýyna túsinik berdi

ASTANA. KAZINFORM – Jasandy ıntellekt jáne tsıfrlyq damý mınıstrligi Freedom Telecom kompanııasynyń «ulttyq Wi-Fi operatory» jobasynyń ataýyna qatysty túsinikteme berdi. 

— Freedom Telecom kompanııasynyń «ulttyq Wi-Fi operatory» degen ataýy tek shartty túrde aıtylǵan. Bul sóz tirkesi jobanyń aýqymyn jáne mańyzyn ǵana kórsetedi. Atalǵan tirkes kompanııanyń resmı mártebesin aıqyndamaıdy jáne oǵan qandaı da bir erekshe ókilettik bermeıdi.

Mınıstrlik jekelegen kompanııalarǵa mundaı resmı mártebe berý múmkindigin qarastyrmaıdy, — delingen Jasandy ıntellekt jáne tsıfrlyq damý mınıstrligi habarlamasynda.

Jasandy ıntellekt jáne tsıfrlyq damý mınıstrligi qoǵamdyq oryndar men áleýmettik nysandarda Wi-Fi jelilerin damytý boıynsha turaqty jumys júrgizip keledi.

— Osy baǵytta Freedom Telecom kompanııasy mınıstrliktiń qoldaýymen el qalalarynda keń kólemdi Wi-Fi jelilerin iske qosýda. Búginde 10 qala qamtylyp, shamamen 400 núkte iske qosyldy. 2026 jylǵa qaraı olardyń sany 10 myńǵa, al 2027 jylǵa qaraı 20 myńnan asady dep josparlanǵan. Wi-Fi mektepterde, aýrýhanalarda, áýejaılar men vokzaldarda, sondaı-aq shekara beketterinde ornatylady.

Joba mınıstrlikpen tyǵyz baılanysta iske asyrylyp jatyr. Bul azamattarǵa ınternetke qaýipsiz ári turaqty qoljetimdilikti qamtamasyz etedi.

Mundaı jobalardy tıisti ruqsaty men tehnıkalyq múmkindigi bar basqa baılanys operatorlary da júzege asyra alady. Freedom Telecom — osy baǵytta memleketpen seriktes bolyp otyrǵan negizgi kompanııalardyń biri, — delingen habarlamada.

21 qazanda Premer-mınıstr Oljas Bektenovtyń tóraǵalyǵymen ótken Úkimet otyrysynda telekommýnıkatsııalyq ınfraqurylymdy damytý máseleleri qaralǵan edi. Otyrysta Freedom Telecom kompanııasynyń bas dırektory 2028 jylǵa deıingi damý strategııasyn tanystyryp, «ulttyq Wi-Fi operatory» jobasyn iske asyrý jospary týraly aıtqan.