Ulttyq valıýta men emıssııalyq organdy Konstıtýtsııada aıqyndaý qajet – Nurtaı Sabılıanov
ASTANA. KAZINFORM – Konstıtýtsııalyq reformalar jónindegi komıssııanyń segizinshi otyrysynda Parlament Májilisiniń depýtaty Nurtaı Sabılıanov ulttyq valıýtany Konstıtýtsııa deńgeıinde bekitý memlekettiń ekonomıkalyq egemendiginiń mańyzdy kórinisi ári qarjylyq turaqtylyqtyń negizi ekenin atap ótti.
Depýtattyń aıtýynsha, aqsha júıesinde tutas ári logıkalyq aıaqtalǵan konstıtýtsııalyq model qalyptastyrý úshin ulttyq valıýtany shyǵarýdy júzege asyratyn jáne aqsha-kredıt saıasatynyń turaqtylyǵyn qamtamasyz etetin ýákiletti emıssııalyq organdy aıqyndaıtyn normany engizýdiń mańyzy zor.
– Aqsha aınalymy qarjy júıesiniń negizgi elementi retinde tek belgilengen valıýtanyń bolýyn ǵana emes, sonymen qatar ony shyǵarýǵa, retteýge jáne turaqtylyǵyn qorǵaýǵa jaýapty ınstıtýttyń naqty anyqtalýy qajet. Mundaı konstıtýtsııalyq bekitý quqyqtyq aıqyndyqty, ınstıtýtsıonaldyq turaqtylyqty jáne qarjy júıesiniń boljamdylyǵyn qamtamasyz etedi. Bul tásil tsıfrlyq qarjy quraldary, vırtýaldy aktıvter jáne ekonomıkalyq aınalymda keńinen qoldanylyp kele jatqan ózge de esep aıyrysý quraldary belsendi damyp jatqan jaǵdaıda erekshe ózektilikke ıe, – dedi Nurtaı Sabılıanov.
Onyń aıtýynsha, atalǵan úrdister memlekettiń resmı aqsha birligi men zańdy tólem quraly mártebesine ıe emes ózge qarjy aktıvteri arasyndaǵy naqty konstıtýtsııalyq aıyrmashylyqtyń mańyzyn arttyra túsedi.
– Emıssııalyq organnyń Konstıtýtsııada aıqyndalýy ulttyq valıýtanyń turaqtylyǵyn qalyptastyratyn ári oǵan kepildik beretin ınstıtýtty naqty kórsetýge múmkindik beredi. Bul óz kezeginde qarjy júıesine degen senimdi nyǵaıtady, – dep tolyqtyrdy depýtat.
Osy turǵyda ulttyq valıýtany shyǵarýǵa aıryqsha quqyq berilgen jáne aqsha-kredıt saıasatyn júrgizýge jaýapty jalǵyz emıssııalyq organ retinde Qazaqstan Respýblıkasynyń Ulttyq bankiniń rólin Konstıtýtsııalyq deńgeıde bekitý júıeli ári negizdelgen sheshim bolyp tabylady.
Buǵan deıin Aıdarbek Qojanazarov jańa Konstıtýtsııada teńgeni ulttyq valıýta dep bekitýdi usynǵan edi.