Ulttyq ýnıversıtetterde qytaı tilin oqytatyn kafedralar qurylady – Saıasat Nurbek
ASTANA. KAZINFORM – Qazaqstan men Qytaı ǵylym jáne bilim salasynda birqatar kelisimge keldi. Tolyǵyraq Ǵylym jáne joǵary bilim mınıstri Saıasat Nurbek aıtyp berdi.
«Búgin álemniń nazary Astanada dep aıtýǵa bolady. ShYU-ǵa múshe elderdiń basshylary elordada jınalyp otyr, qurmetti qonaqtardyń qatarynda BUU-nyń Bas hatshysy Antonıý Gýterrısh myrza da bar. Keshe Qytaı Halyq Respýblıkasynyń Tóraǵasy Sı Tszınpınniń elimizge resmı sapary aıasynda kóptegen kelisimshartqa qol qoıyldy. Onyń ishinde eki eldiń mınıstrligi bilim jáne ǵylym salasy boıynsha da kelisimge keldi. Oǵan sáıkes bizdiń jetekshi, ulttyq jáne memlekettik ýnıversıtetterde qytaı tilin oqytý úshin arnaıy kafedralar qurylady. Bakalavr, magıstratýra men doktorantýrada oqyp jatqandarǵa qytaı tilin ekinshi til retinde usynatyn bolamyz», - dedi Saıasat Nurbek elordada ótip jatqan «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda.
Sondaı-aq, mınıstr Qytaı – Qazaqstannyń eń úlken strategııalyq kórshi eli ekenin tilge tıek etti.
«Qytaı- ekonomıka, saýda jaǵynan da seriktes el, sondyqtan Qytaıdyń tarıhyn, tilin, mádenıetin biz tereńinen túsinýimiz kerek. Taǵy bir kelisim, Sátpaev ýnıversıtetiniń negizinde Gonkong ýnıversıtetiniń fılıaly ashylady. Onda jasandy ıntellekt, arhıtektýra, aqyldy kólik taǵy sol sııaqty salalar boıynsha bilim beriledi. Atalǵan Gonkong qalalyq ýnıversıteti óte tez damyp kele jatqan joǵary oqý orny, álemdegi úzdik 100 ýnıversıtettiń qataryna kiredi. Bıyl qyrkúıekte ýnıversıtet fılıaly esigin ashady», - deıdi ol.
Buǵan deıin QR Prezıdentiniń keńesshisi Bolat Aqsholaqov ShYU sammıti jáne uıymǵa múshe elder arasynda ǵylym men joǵary bilimdi damytýǵa qatysty pikir bildirgen edi.
Búgin elordadaǵy Astana IT ýnıversıtetinde «Joǵary bilim berý jáne óndiristi ıntegratsııalaý salasyndaǵy yntymaqtastyq» degen ataýmen halyqaralyq sımpozıým ótip jatyr.
Jıyn barysynda «ShYU-ǵa qatysýshy elderdiń joǵary bilim berý salasyndaǵy halyqaralyq yntymaqtastyǵy» kitabynyń tusaýy keser rásimi josparlanyp otyr.
Aıta keteıik, qazir elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.
Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty.
