Ulttyq ulannyń jedel brıgadasy men «Búrkit» jasaǵy áskerı sherýden ótti

ASTANA. KAZINFORM — Jeńistiń 80 jyldyǵyna arnalǵan áskerı paradqa eldiń ishki tynyshtyǵyn kúzetetin jasaqtar qatysyp jatyr.

Sherý alańynda Ulttyq ulannyń jedel maqsattaǵy І jeke brıgadasynyń saltanatty eseptoby sap túzep barady. Bul brıgada polıtsııa qyzmetkerlerimen birge Astana men onyń irgesindegi aýyl kóshelerinde tynyshtyqty kúzetedi. Іri halyqaralyq, qoǵamdyq-saıası jáne sporttyq is-sharalar kezinde qaýipsizdikti qamtamasyz etetin osylar. 

Ulttyq ulannyń betke ustar jasaǵy — arnaıy maqsattaǵy «Búrkit» rotasy parad alańynda. Ózderin ishki áskerdiń elıtasy dep sanaıtyn «Búrkit» jasaǵy bul ataǵyn halyqaralyq deńgeıde dáleldep júr. Jaqynda Ulttyq gvardııa arnaıy kúshteriniń komandasy Dýbaıdaǵy UAE SWAT Challenge halyqaralyq jarysynda alǵashqy ondyqqa kirdi. Bular kúndelikti qyzmetinde qarýly qylmyskerlerdi zalalsyzdandyrýǵa, esirtki qylmysyna qarsy arnaıy operatsııalarǵa qatysady.

Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan. 

Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysyp otyr. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qosýda.