Ulttyq ulannyń ushaq, tikushaqtarymen zardap shekken aımaqtarǵa gýmanıtarlyq kómek jetkizilip jatyr
ASTANA. KAZINFORM - Ulttyq ulannyń ushqyshtary cý tasqynyna qarsy sharalarǵa úlken úles qosyp jatyr. Búginde 62 tonnadan astam gýmanıtarlyq júk jetkizildi.
Qazirdiń ózinde 5 áskerı-kóliktik ushaq pen tikushaq jumyldyrylǵan. Olar kún saıyn gýmanıtarlyq kómegin jetkizedi jáne jeke quramdy aýystyrady, sý tasqyny men yqtımal sý basý oryndaryna ushyraǵan aýmaqty aınalyp ótedi.
Qazaqstandaǵy sý tasqyny boıynsha jaǵdaı kúrdeli kúıinde qalyp otyr. Apatpen kúreste barlyq qazaqstandyq birigip jatyr. Sý tasqyny aımaqtarynda qoǵamdyq tártipti qorǵaý boıynsha táýlik boıy qyzmet atqaratyn Ulttyq ulannyń áskerı qyzmetshileri de úlken kómek kórsetedi. Al tutastaı alǵanda sý tasqyny saldaryn joıý úshin quqyqtyq tártip áskerleriniń jeke quramynan 1600-den astam áskerı qyzmetshi jumyldyrylǵan.
Onyń ishinde árbir tórtinshisi – Aqtóbe qalasynda ornalasqan 6655 áskerı bóliminiń áskerı qyzmetshisi. Olar 4 aýysymda 17 tehnıka birligimen táýlik boıy polıtsııa qyzmetkerlerimen birge Kırpıchnyı jáne Zarechnyı sý basqan kentteriniń kóshelerinde urlyqqa jol bermeý boıynsha qyzmet atqaryp jatyr.
Sondaı-aq Aqtóbe ulandyqtary Shubarqudyq jáne Oıyl eldi mekenderinde qalpyna keltirý jumystaryn júrgizý úshin áskerı bólimniń avtootyn quıýshysynyń kómegimen janar-jaǵarmaı materıaldaryn jetkizedi. Otyndy Aqtóbe oblysynyń ákimdigi usyndy.
Qazaqstannyń batysynda 5546 áskerı bóliminiń (Atyraý q.) 10 avtotehnıka birliginde 120 adamnan astam áskerı qyzmetshileri sý tasqynyna qarsy is-sharalardy ótkizýge belsendi qatysady. Onyń ishinde 50 sarbaz ben ofıtserler 2 aýysymda qoǵamdyq tártipti qorǵaýdy qamtamasyz etedi. Olar polıtsııa qyzmetkerlerimen birlesip Qulsary qalasynyń kóshelerinde urlyqqa jol bermeý boıynsha qyzmet atqarady. Sý tasqyny kezinde tikeleı kómek retinde 75 áskerı qyzmetshi qap daıyndaıdy.
Aıta ketý kerek, Ulttyq ulan jaýyngerleriniń eńbekqorlyǵy qarapaıym turǵyndardyń da, ár túrli qoǵamdyq uıymdar men sheneýnikterdiń de nazarynan tys qalmady. Atyraý qalasynda júrgende álemge áıgili ánshi jáne mýltıınstrýmentalıst Dımash Qudaıbergen jyly lebizderin bildirdi.
«Qazirgi ýaqytta ulandyqtardyń eńbegi óte zor. Bizdiń halqymyzdyń beıbitshiligi men qaýipsizdigi úshin kún men túnde eńbek etý erlik dep aıtý artyq aıtqandyq emes. Ulandyqtardyń bul erlik isteri máńgi este qalady», - dep atap ótti Qazaqstannyń Halyq ártisi.
Jalpy, ulandyqtar eldiń barlyq sý basqan aımaqtaryna jaǵalaýdy nyǵaıtý jumystaryna belsendi qatysyp jatyr. Sý tasqynymen qamtylǵan eldi mekenderde sý burýdy jáne kanaldardy tazartýdy júzege asyrady. Máselen, búgingi tańda quqyqtyq tártip áskerleriniń áskerı qyzmetshileri jalpy uzyndyǵy 10 shaqyrymnan asatyn aryqtardy tazartyp, ınertti materıaldary bar 210 myńnan astam qapshyq – qum nemese saz daıyndap, tóseldi.
