Ulttyq ulannyń 3 ofıtseri polıgonda jaraqat aldy

Jambyl oblysyndaǵy polıgonda Ulttyq ulannyń úsh ofıtseri jaraqat aldy. Aqparatty Ulttyq ulannyń baspasóz qyzmeti rastady, dep habarlaıdy QazAqparat.

«25 qyrkúıekte jaýyngerlik daıyndyq josparyna sáıkes «Aısha-Bıbi» oqý polıgonynda Ulttyq ulannyń áskerı bóliminiń áskerı qyzmetshileri oqý-jattyǵý ótkizdi. Qaýipsizdik sharalaryn buzý saldarynan 3 ofıtser aıaǵynan jeńil jaraqat aldy», – delingen habarlamada.

Áskerı qyzmetshiler Taraz qalasynyń emdeý mekemesine jatqyzyldy. Olardyń jaǵdaıy qanaǵattanarlyq, ómirlik mańyzdy organdaryna zalal kelmegen. Bolǵan oqıǵanyń mán-jaıy anyqtalyp jatyr.

Aıta keteıik, búgin taǵy bir tótenshe oqıǵa oryn aldy. Qaraǵandy oblysynyń Balapan alańynda oqý-jattyǵý jasap júrgen ushaq apatqa ushyrady.Áýe kemesi saǵat 08.44-te Doskeı aýylynan 5 km jerde qulady. Іzdestirý jumystary barysynda qıraǵan ushaq pen eki adamnyń denesi tabyldy.