Ulttyq ulannyń «Ońtústik» óńirlik qolbasshylyǵyna jańa qolbasshy taǵaıyndaldy
ASTANA. KAZINFORM — Qazaqstan Respýblıkasy Prezıdenti Ákimshiliginiń kelisimimen jáne Іshki ister mınıstriniń buıryǵyna sáıkes general-maıor Shekarbekov Sákentaı Amantaıuly QR ІІM Ulttyq ulanynyń «Ońtústik» óńirlik qolbasshylyǵynyń qolbasshysy bolyp taǵaıyndaldy.
Bul laýazymǵa deıin general-maıor S. Shekarbekov QR ІІM Ulttyq ulanynyń «Ortalyq» óńirlik qolbasshylyǵynyń qolbasshysy qyzmetin atqarǵan.
Aıta ketý kerek, Ulttyq ulan qoǵamdyq qaýipsizdik pen quqyqtyq tártipti qamtamasyz etý, mańyzdy memlekettik jáne strategııalyq nysandardy kúzetý, qylmys pen ekstremızmge qarsy is-qımylǵa qatysý, sondaı-aq arnaıy jáne profılaktıkalyq is-sharalardy ótkizý kezinde ishki ister organdaryna járdemdesý jónindegi mindetterdi júıeli túrde oryndaýdy jalǵastyryp keledi. Sonymen qatar ulandyqtar buqaralyq is-sharalar kezeńinde jáne tótenshe jaǵdaılar kezinde qoǵamdyq tártipti qamtamasyz etýge jumyldyrylady.
Eske sala ketsek, 2025 jyly quqyqtyq tártip áskerleriniń áskerı qyzmetshileri shamamen 18 myń quqyq buzýshyny ustap, ishki ister organdaryna jetkizdi. Onyń ishinde 700-den astamy qylmys belgileri bar tulǵalar.
Aıta keteıik, Darhan Mahanov Kúzet qyzmetin baqylaý komıtetiniń tóraǵasy bolyp taǵaıyndaldy.
