Ulttyq ulannyń qatarynda qansha áıel áskerı qyzmetshi bar
ASTANA. KAZINFORM — Búginde QR ІІM Ulttyq ulanynyń qatarynda 1478 áıel áskerı qyzmetshi qyzmet atqaryp jatyr. Bul týraly Ulttyq ulannyń baspasóz qyzmeti málim etti.
Olar er azamattarmen ıyq tirestire otyryp, qoǵamdyq qaýipsizdikti qamtamasyz etý, strategııalyq mańyzy bar nysandardy kúzetý jáne quqyqtyq tártipti saqtaý baǵytyndaǵy jaýapty mindetterdi abyroımen oryndap, dástúrli túrde erlerge tán salada laıyqty qyzmet etip júr.
Olardyń kásibı qyzmeti quqyqtyq tártip áskerleriniń negizgi baǵyttaryn qamtıdy. Atap aıtqanda, 240-tan astamy qarjy salasynda qyzmet etip, bıýdjet qarajatynyń ashyqtyǵy men turaqtylyǵyn qamtamasyz etedi. Shamamen 50 áskerı qyzmetshi baılanys bólimshelerinde kommýnıkatsııalyq júıelerdiń úzdiksiz jumysyn baqylaıdy.
— 80-ge jýyq áıel áskerı qyzmetshi mańyzdy memlekettik nysandardy kúzetýge jumyldyrylǵan, 50-i — avıatsııa salasynda qyzmet etedi, al 53 maman áskerı qyzmetshilerdiń barlyq sanattarynyń moraldyq-psıhologııalyq ahýalyna jaýap beredi, — delingen habarlamada.
200-den astam áıel ofıtserlik laýazymdardy atqaryp, joǵary kásibılik deńgeıin, basqarýshylyq quzyretteri men kóshbasshylyq qasıetterin aıqyn kórsetip keledi.
Pogon taqqan arýlar Ulttyq ulannyń jaýyngerlik qabiletin nyǵaıtýǵa jáne tıimdiligin arttyrýǵa súbeli úles qosyp, Otanǵa qyzmet etý er men áıel dep bólinbeıtinin kún saıyn dáleldep júr.
Eske sala keteıik, Memleket basshysy Qasym-Jomart Toqaev Halyqaralyq áıelder kúnine arnalǵan saltanatty is-sharada sóz sóılegen sózine túrli salalar boıynsha elimizdiń abyroıyn asqaqtatyp júrgen áıelderdiń róline toqtalyp, áıelder otbasyndaǵy qasıetti mıssııasy men Otan aldyndaǵy qasterli mindetin qatar atqaryp júrgenin aıtqan edi.
