Ulttyq ulannyń Erler hory elordalyq arýlarǵa merekelik kóńil-kúı syılady
ASTANA. KAZINFORM — Halyqaralyq áıelder kúni qarsańynda QR ІІM Ulttyq ulany Án-bı ansambliniń Erler horynyń solısteri astanalyq turǵyndar men qonaqtar úshin merekelik aktsııa uıymdastyrdy.
QR ІІM Ulttyq ulanynyń baspasóz qyzmetiniń málimetinshe, mýzykalyq qoıylymdar qalanyń qoǵamdyq kólikterinde jáne «Nurly jol» vokzal kesheninde ótti.
Ártister qoǵamdyq kólikte jandy daýysta tanymal kompozıtsııalardy oryndap, avtobýs ishin kontserttik alańǵa aınaldyrdy.
Mýzykalyq tosynsyı jolaýshylardyń erekshe yqylasyna bólendi. Hordyń oryndaýyndaǵy «Sulý qyzdar» jáne «Darıte jenşınam tsvety» ánderin kópshilik jyly qabyldady. Qoıylym kezinde ulandyqtar názik jandylarǵa gúl syılap, kele jatqan merekelerimen quttyqtady.
Merekelik baǵdarlama «Nurly jol» vokzalynda da jalǵasty, munda ártister aıaýly jandarǵa gúl shoqtaryn tabystap, kóterińki kóńil-kúı syılady.
Aıta keteıik, buǵan deıin Ulttyq ulannyń Erler hory Reseıdiń tanymal «Ný-ka, vse vmeste!» vokaldyq shoýynda Numb hıtyn (Linkin Park toby) dombyra súıemeldeýimen oryndap, aıryqsha qoldaýǵa ıe bolǵan edi.
Rok-kompozıtsııanyń erekshe ınterpretatsııasy joǵary baǵalanyp, qazaqstandyq áskerı ártisterdiń kásibı deńgeıi men shyǵarmashylyq batyldyǵyn kórsetti.
Ulttyq ulannyń Úlgili-kórsetimdi orkestri, Án men bı ansambli, Erler hory turaqty túrde jeke quram aldynda jáne keń aýdıtorııa úshin óner kórsetip, jaýyngerlik rýhty kóterýge, ulttyq mádenıetti dáripteýge jáne quqyqtyq tártip áskeriniń oń ımıdjin qalyptastyrýǵa úles qosyp keledi.