Ulttyq ulannyń burynǵy áskerı qyzmetshisi Erbaıan Muhtar ómirden ótti
ASTANA. KAZINFORM – 2023 jyly áskerı qyzmetti ótkerý kezinde aýyr bas súıek-mı jaraqatyn alǵan Ulttyq ulannyń burynǵy áskerı qyzmetshisi Muhtar Erbaıan qaıtys boldy.
- Ókinishke qaraı, búgin Erbaıannyń júregi toqtaǵanyn bildik. Bul jazba qoshtasý úshin ǵana emes. Óıtkeni Erbaıan osy eki jyl ishinde óziniń ómiri úshin kúrese otyryp, myńdaǵan sarbazdyń taǵdyryna áser etti. Onyń oqıǵasy arqyly áskerdegi kóptegen másele ashyq aıtyla bastady, - dep jazdy advokat Inga Imanbaı óziniń áleýmettik jelidegi paraqshasynda.
Sonymen qatar QR Densaýlyq saqtaý mınıstrligi Muhtar Erbaıannyń qaıtys bolýyna baılanysty onyń otbasy men jaqyndaryna kóńil aıtyp, málimdeme jasady.
- Dárigerler úsh jylǵa jýyq ýaqyt boıy naýqastyń ómirin saqtap qalý úshin kúresti. Alaıda alǵan asa aýyr jaraqatynyń saldarynan bas mıynda qaıtymsyz ózgerister bolyp, naýqastyń ómirin saqtap qalý múmkin bolmady. Naýqas Muhtar Erbaıan Hamıtuly 2023 jyldan beri merzimdi áskerı qyzmetin óteý kezinde alǵan aýyr bas-mı jaraqatynyń saldarynan asa aýyr jaǵdaıda boldy. Uzaq ýaqyt boıy turaqty vegetatıvtik kúı saqtaldy. Respıratorlyq qoldaýdy qosa alǵanda, qarqyndy terapııa júrgizilgenine qaramastan, ómirlik mańyzdy kórsetkishterdiń birtindep nasharlaýy baıqaldy. Atap aıtqanda, qandaǵy ottegi satýratsııasynyń tómendeýi, júrek yrǵaǵynyń buzylýy jáne gemodınamıkanyń turaqsyzdyǵy tirkeldi. Naýqastyń jaǵdaıy asa aýyr kúıinde qaldy. Medıtsına mamandary tarapynan barlyq qajetti reanımatsııalyq jáne emdik is-sharalar kesheni tolyq kólemde júrgizildi. Іshki ister mınıstrligi men Densaýlyq saqtaý mınıstrliginiń birlesken uıymdastyrýymen naýqas em alý úshin Túrkııa Respýblıkasyna jiberilip, onda bastapqy dıagnoz rastaldy. 2026 jyldyń maýsym aıynda negizgi aýyr syrqattyń aıasynda ınfektsııalyq asqynýlar, sepsıs jáne aǵzadaǵy fýnktsııanyń nasharlaýy sındromy baıqaldy. 2026 jylǵy 23 maýsymda saǵat 21:40-ta naýqastyń bıologııalyq ólimi tirkeldi, - delingen mınıstrliktiń habarlamasynda.
Eske salsaq, áskerde júrip, basynan jaraqat alǵan Ulttyq ulannyń qatardaǵy jaýyngeri Erbaıan Muhtar birneshe aı boıy komada jatqan bolatyn.
Byltyr ol Ystanbuldaǵy eminiń alǵashqy kezeńin aıaqtap, Astanaǵa oralǵan.
