Ulttyq ulannyń bir áskerı bóliminde bes jup egiz Otan aldyndaǵy boryshyn ótep júr
ASTANA. KAZINFORM — Almatydaǵy QR ІІM Ulttyq ulanynyń 5571 áskerı bóliminde bir mezgilde bes jup egiz sarbaz qyzmet etedi. Sapqa turǵan kezde egizderdi bir-birinen ajyratý ońaı emes.
Elimizdiń ár túkpirinen áskerge shaqyrylǵan on sarbaz búginde bir áskerı bólimde qyzmet etip júr. Biri sportqa jaqyn bolsa, endi biri ónerge áýes. Olardy týystyq baılanystan bólek, Otan aldyndaǵy ortaq mindet te jaqyndastyrady.
Aqtóbelik Aman men Esen Baıdýllaevtardyń jasy 19-da. Ekeýiniń arasy nebári toǵyz mınýt. Áskerı ortaǵa tez beıimdelgen baýyrlar qyzmet barysynda ózderin jaqsy qyrynan tanyta bildi. Dálirek aıtsaq, jaýyngerlik qyzmet kezinde esirtki zattaryn tasymaldaǵan azamatty ustaý operatsııasyna qatysqan.
Qyzylordadan shaqyrylǵan Nurtóre men Jantóre Nuryldanyń jasy 20-da. Otbasyndaǵy kenje uldar bilim jolynda eki túrli mamandyqty tańdaǵan. Nurtóre dene shynyqtyrý pániniń muǵalimi mamandyǵyn meńgerse, Jantóre feldsher dıplomyn alǵan. Qazir ekeýi de áskerı mindetin bir bólimde atqaryp júr.
Bes juptyń arasynda Aman men Esen esimdi taǵy bir egiz bar. Túrkistan oblysynan shaqyrylǵan Saparalylardyń ónerge degen yqylasy erekshe. Olar halyq ánderi men termelerdi oryndaǵandy unatady. Bul ónerge degen súıispenshilik ákelerinen daryǵan. Aıta keterligi, ulandyqtardyń ákesiniń de egiz inileri bar. Aman men Esen 18 jasqa tolǵan kúnniń erteńinde-aq áskerge attanyp, azamattyq boryshyn óteýge bel býǵan.
Tarazdyq Nurasyl men Erasyl Iashovtar mektepti támamdaǵan soń kóp uzamaı Otan aldyndaǵy boryshyn óteýge kirisken. Qazir ekeýi de 19 jasta. Qyzmet barysynda olar polıtsııa qyzmetkerlerimen birlesip, quqyq buzýshylyqtyń aldyn alý jumystaryna qatysady. Qoǵamdyq tártipti saqtaýǵa da óz úlesterin qosyp júr. Buǵan qosa baýyrlar «Sarbaz 2.0» bilim berý baǵdarlamasyna qatysýǵa ótinish berip úlgergen. Bul joba merzimdi áskerı qyzmetin ótep júrgen jastarǵa tegin bilim alýǵa jol ashady.
Kentaýlyq Almas pen Oljas Ábdýálıevter de 19 jasta. Áskerge deıin olar Shymkenttegi «Mıras» ýnıversıtetinde «Alǵashqy áskerı jáne tehnologııalyq daıyndyq» mamandyǵy boıynsha bilim alǵan. Aldaǵy ýaqytta ustazdyq joldy jalǵastyryp, mektep oqýshylaryna áskerı istiń qyr-syryn úıretýdi kózdeıdi. Bir qyzyǵy, Almas pen Oljastyń otbasynda taǵy bir jup egiz bar.
Bir áskerı bólimde qatar qyzmet etý on sarbaz úshin erekshe tájirıbege aınaldy. Olar áskerı ómirdiń qıyndyqtary men qyzyqtaryn birge ótkerip, bir-birine súıenish bolyp júr. Árqaısysy óz mindetine jaýapkershilikpen qarap, quqyqtyq tártip pen qoǵamdyq qaýipsizdikti qamtamasyz etýge úles qosýda. Al áskerı orta olardyń óz betinshe shyńdalyp, bolashaqqa nyq qadam jasaýyna múmkindik berip otyr.
Aıta keteıik, jyl basynan beri Ulttyq ulannyń áskerı qyzmetshileri qoǵamdyq tártip saqtaý boıynsha 2,3 myńnan astam tapsyrmany oryndady. Patrýldik-bekettik qyzmet barysynda 13 myńnan astam quqyq buzýshy ishki ister organdaryna jetkizildi. Olardyń 300-i qylmys jasady degen kúdikpen ustaldy.
Bul baǵyttaǵy qyzmetke Ulttyq ulannyń on myńǵa jýyq áskerı qyzmetshisi jumyldyrylǵan. Kún saıyn elimizdiń 21 qalasynda 7 myńnan astam ulandyq qoǵamdyq tártipti qamtamasyz etip júr. Sonymen qatar 2 myńnan astam áskerı qyzmetshi memlekettik mańyzy bar nysandar men qylmystyq-atqarý júıesi mekemeleriniń qaýipsizdigin kúzetip júr.
Buǵan deıin birge áskerge barǵan egizder bolashaq mamandyǵyn da birge tańdaǵanyn jazdyq.
