Ulttyq ulannyń áskerı bólimderinde 40-qa jýyq egiz jup qyzmet etip júr
ASTANA. KAZINFORM - Quqyqtyq tártip áskerinde egizderdi bir-birinen ajyratpaý dástúri qatań saqtalǵan. Olar bir áskerı bólimshede birge qyzmet atqarady.
Búginde Qazaqstan boıynsha Ulttyq ulan sapynda 40-qa jýyq egizder juby el qaýipsizdigin qamtamasyz etýge úles qosyp júr.
Solardyń qatarynda Astana qalasyndaǵy jedel brıgadada qyzmet etetin Almas pen Oljas Súleımenovter jáne 6636 áskerı bóliminde boryshyn ótep júrgen Rostıslav pen ıAroslav Tarandar bar. Bir qyzyǵy, qos áskerı bólimde qyzmet etip júrgen egiz jaýyngerlerdiń týǵan jerleri de bir – Pavlodar qalasy.
Súleımenovter elorda tynyshtyǵyn kúzetýge atsalyssa, Tarandar áskerı bólimniń qaraýyl qyzmetin minsiz atqaryp keledi. Egizderdi alǵash kórgen adam birden ajyrata almaıdy. Dese de, qyzmettesteri ýaqyt óte kele olardyń minezi men bolmysyndaǵy erekshelikter arqyly ajyratýdy úırengen.
5573 áskerı bóliminiń sarbazy Almas Súleımenovtiń aıtýynsha, áskerde egiz baýyryńmen birge qyzmet atqarýdyń orny bólek.
– Bala kezden birge óstik, endi Otan aldyndaǵy boryshymyzdy da qatar ótep jatyrmyz. Bul biz úshin úlken maqtanysh ári umytylmas kezeń. Bir-birimizge árdaıym qoldaý kórsetip, qatar damyp kelemiz. Otan aldyndaǵy boryshymyzdy birge ótep jatqanymyzdy maqtan tutamyz, – deıdi qatardaǵy Almas Súleımenov.
Ulttyq ulandaǵy egiz sarbazdardyń qyzmeti – baýyrlastyqtyń, birliktiń jáne Otanǵa degen adaldyqtyń jarqyn kórinisi. Olar kún saıyn áskerı antqa adal bolyp, júktelgen mindetti abyroımen oryndap keledi.
Egizderdiń ónegeli joly elge qyzmet etýdiń tek paryz ǵana emes, úlken maqtanysh ekenin taǵy bir márte dáleldeıdi.
Buǵan deıin biri jol apatyn tergep, ekinshisi qoǵamdyq tártipti kúzetetin egiz polıtseıler týraly jazǵan edik.
